“ორსულობისა და ბავშვის გაჩენის შემთხვევაში, არალეგალს თავისუფლად შეუძლია გააკეთოს იტალიური ბინადრობის ნებართვა, ანუ გახდეს ლეგალი” - ფიქრია კუჭუხიძე

უცხო ქვეყანაში მცხოვრებ არალეგალებს, ამ შემთხვევაში საუბარი გვაქვს ქართველებზე, ხშირად იმაზე მეტი უფლება აქვთ მიმღებ ქვეყანაში, ვიდრე წარმოუდგენიათ, მაგრამ ინფორმაციის ნაკლებობის, ასევე ენობრივი ბარიერის გამო, შესაძლებლობას, რომ მათი უცხო ქვეყანაში ყოფნა ლეგალური გახადონ, ხელიდან უშვებენ.

მაგალითად, არალეგალ ქალს, თუ ის ორსულად არის, უფლება აქვს მოითხოვოს დროებით ბინადრობის ნებართვა და შემდეგ, რეკვიზიტების არსებობის შემთხვევაში, მისი კონვერტირება მოახდინოს სამუშაო მოტივით ბინადრობის ნებართვაში.

საემიგრაციო საზოგადოება „Anolf“-ის ქართველი ოპერატორი ფიქრია კუჭუხიძე სწორედ ამის შესახებ ავრცელებს ინფორმაციას:

"უსაბუთო ორსული ქართველი ქალბატონი იტალიაში - მას აქვს უფლება მოითხოვოს ბინადრობის ნებართვა სამკურნალო მოტივით (Permesso di soggiorno per cure mediche) და მშობიარობის შემდეგ, სანამ საბუთს ვადა გაუვა, გადაავადოს და გააკეთოს მოთხოვნა ბინადრობის ნებართვაზე მოტივით არასრულწლოვანის თანმხლები პირი (Permesso di soggiorno per assistenza minori). ამის გაკეთება შეუძლია როგორც მარტოხელა დედას, ასევე ორივე მშობელს, თუ ორივე სახეზეა.

უპირობო მოთხოვნაა, რომ მშობლებს არ უნდა ჰქონდეთ სამართალდამცველებთან პრობლემა. ეს ხელის შემშლელი ფაქტორია ამ  კატეგორიის "პერმესოსთვის". ამ 6 თვიანი საბუთით პირს აქვს გადაადგილების უფლება მის ქვეყანაში!

"პერმესოსთან" ერთად გვარდება სხვა საბუთებიც: მისამართზე ჩაწერა, იტალიური პირადობის მოწმობა, ფისკალური კოდი და ა.შ.

შეგახსენებთ, რომ  საბავშვო 2 წლიანი "პერმესოს" აღების შემდეგ, შვიდ თვეში ამ საბუთის გადაცვლა უპრობლემოდ არის შესაძლებელი სუბორდინირებულ სამუშაო ბინადრობის ნებართვაზე (Permesso di soggiorno subordinato per lavoro). მთავარია,  პირს ჰქონდეს სამუშაო ხელშეკრულება."