ოთხდღიანი სამუშაო კვირა, უერთდება თუ არა იტალია ევროპის სხვა ქვეყნებს ამ ინიციატივაში?!

ოთხდღიანი სამუშაო კვირა, უერთდება თუ არა იტალია ევროპის სხვა ქვეყნებს ამ ინიციატივაში?!

სულ უფრო იზრდება იმ ქვეყნებისა და კომპანიების სია, რომლებიც ოთხდღიან სამუშაო კვირაზე გადავიდნენ.
კიდევ ერთი ევროპული ქვეყანა, რომელიც აღნიშნულ სისტემაზე გადავიდა და თანაც ხელფასის შემცირების გარეშე, ბელგიაა.
ამ გზით, დასაქმებულებს უფრო მეტი დრო აქვთ საკუთარი თავისთვის, ოჯახისა და მოგზაურობისთვის, ეს ყველაფერი კი, დასაქმებულთა პროდუქტიულობას საგრძნობლად ზრდის. გარდა ამისა, ჰაერის დაბინძურების მხრივაც შეღავათია, რადგან მანქანები ნაკლებად მოძრაობენ ქუჩებში.
შოტლანდიამ გასულ წელს, 20 პროცენტით შეამცირა დასაქმებულთა სამუშაო საათები, ხელფასის შენარჩუნებით. 

ასევე ესპანეთმაც გასულ წელს, მომუშავეთა კონტრაქტი 39 საათიდან 32 საათზე დაიყვანა. 
ისლანდიამ ეს ხერხი, ექსპერიმენტის სახით, 2014 წელს დაიწყო რეიკიავიკში, გარკვეულ სექტორებში. დაკვირვებამ აჩვენა, რომ თანამშრომელთა ჯანმრთელობა და განწყობა გაცილებით გაუმჯობესდა და არც პროდუქტიულობაზე ასახულა ცუდად.

მიმდინარე წელს, "მარათონში" დიდი ბრიტანეთის 30-მდე კომპანიაც ჩაერთო. ასევე იაპონიაც და არაბთა გაერთიანებული საამიროები.

რაც შეეხება იტალიას, დღესდღეობით აღნიშნული საკითხის განხორციელება უტოპიაა. ეს ინიციატივა, ექსპერიმენტის სახით, მხოლოდ რამდენიმე კერძო პატარა კომპანიამ გაიზიარა.