„პუტინ, შეჩერდი, სანამ დროა!“ - ალ ბანო “მეგობარს” მიმართავს

პუტინის რუსეთის აგრესიულ და დამპყრობლურ პოლიტიკას, სულ უფრო მეტი ცნობილი ადამიანი აკრიტიკებს. მათ შორის ისეთებიც, რომლებიც აქამდე რუსეთის პრეზიდენტის მეგობრებად მოიზარებოდნენ. სწორედ ერთ-ერთი მათგანია ცნობილი იტალიელი მომღერალი ალ ბანო. ალ ბანომ უკვე გააუქმა ოქტომბერში მოსკოვსა და სანკტ-პეტერბურგში დაგეგმილი კონცერტები. 

მომღერლისთვის და მისი შემოქმედებისთვის, რუსეთი ძალიან დიდი ხნის განმავლობაში ნამდვილი სამოთხე იყო. 2013 წელს, სწორედ რუსეთში მოხდა მისი და რომინას ტანდემის აღდგენა, მაგრამ ახლა მომღერალი ღიად საუბრობს, რომ მიუხედავად წარსულში მისი პუტინისადმი დიდი სიმპათიებისა, ვერ ამართლებს მის ვერცერთ ნაბიჯს და ვერაფრით წარმოიდგენდა მისგან იმას, რასაც ახლა აკეთებს. ვერასდროს წარმოიდგენდა, რომ პუტინი აამუშავებდა ომის მანქანას საკუთარი ძმების წინააღმდეგ.

„პუტინ, შეჩერდი სანამ დროა!“ - მიმართა ალ ბანომ პუტინს ერთ-ერთი სატელევიზიო გადაცემის საშუალებით, სადაც უკრაინაში განვითარებულ მოვლენებზე ისაუბრა. მისი აზრით, პრობლემა რუსი ერი არაა და არ არის მართებული პუტინის განზოგადება მთელ რუს ხალხზე. პუტინს მთელი მსოფლიოს თვალში დაენგრა იმიჯი, წარმოუდგენელი და მიუღებელია საავადმყოფოების, ბავშვებისა და ქალების დაბომბვა. 

ალ ბანოს დიდი კავშირები აქვს რუსეთში და როგორ თავად ამბობს, ერთმა მისმა ძალიან გავლენიანმა ნაცნობმა უთხრა, რომ რუსეთში საშინელება ტრიალებს. მომღერალი დიდ იმედს იტოვებს, რომ თავად რუსები შეეცდებიან მის შეჩერებას. რაც შეეხება შკითხვას, თუ იმოქმედებს რუსეთზე სანქციები, მომღერალმა შემდეგი პასუხი გასცა: „რუსეთი იმდენად მდიდარია, რომ სანქციებით ბევრს ვერაფერს დააკლებენ, ამის საფასურს, ჩვენ უფრო გადავიხდით“.