ქართულ-იტალიური დუეტი “ლალიმბერტი”, მალე “სულიკოს” იტალიურ ვერსიას შემოგვთავაზებს (ვიდეო)

იტალიაში მოღვაწე ქართულ-იტალიურ დუეტი „ლალიმბერტი“, სასიამოვნო სიახლის შესახებ ავრცელებს ინფორმაციას: „17 დეკემბრიდან ყველა Music Store-ში დუეტი “ლალიმბერტი“ - და სიმღერა „სულიკოს“ სრული ვერსია - ბარბარობა დღეს, ვარინკა მაჭავარიანი-წერეთლის მოსაგონებლად.“

სულ მალე, დუეტი მსმენელს „სულიკოს“ იტალიურ ვერსიასაც შესთავაზებს, რომლის ტექსტის თარგმანიც, პაოლო სტატუტის ეკუთვნის.

დუეტ „ლალიმბერტის“ სულისჩამდგმელები, დუჩო ლიმბერტი და ლალი ბურდული, იტალიაში, ტოსკანას ერთ-ერთ ულამაზეს პატარა ქალაქ პოჯიბონსში ცხოვრობენ. დუჩომ და ლალიმ ბედი ერთმანეთს წლების წინ დაუკავშირეს. იტალიელი ხელოვნის ცხოვრებაში, რომელიც დაბადებიდან უსინათლოა, მუსიკას განსაკუთრებული ადგილი უჭირავს. როდესაც დუჩო ლიმბერტის უსმენ, გიჩნდება განცდა, რომ თითქოს მელოდიით ეფერება სამყაროს. 

წყვილი ერთმანეთს სწორედ მუსიკის სიყვარულმა დააკავშირა. მათ ჯვარი რამდენიმე წლის წინ დაიწერეს. დუჩო მართლმადიდებლური წესითაც მოინათლა. როგორც თავად ამბობს, მოინათლა, რათა სიცოცხლის ბოლომდეც და მარადიულობაშიც, საყვარელი მეუღლის გვერდით დარჩნილიყო. ასე შეიქმნა ლალისა და დუჩოს ქართულ-იტალიური ოჯახი და დუეტი „ლალიმბერტი“. დუეტის რეპერტუარში არის როგორც იტალიური და ქართული, ასევე რუსული, ინგლისური, ბერძნული, ფრანგული, ესპანური და ნეაპოლიტანური სიმღერები. 

სანამ ამ არაჩვეულებრივი დუეტის შესახებ სხვა სიახლეებსა და მეტ ინფორმაციას მოგაწვდიდეთ, გთავაზობთ "ლალიმბერტის" მიერ იტალიურ ენაზე შესრულებულ "კართან მოდგა შემოდგომა"-ს. სიმღერის ამ ვერსიამ, ქართულ ემიგრაციულ საზოგადოებაში, დიდი მოწონება და სიყვარული ხვდა წილად.

ნინა მამუკაძე