ქუთაისში ხშირად იყენებენ სიტყვა "სიმონ"- ს, თუმცა, ცოტამ თუ იცის საიდან მოდის ამ სიტყვის ისტორია

ცნობილია, რომ ქუთაისში საუბრისას ხშირად იყენებენ სიტყვა "სიმონ"- ს, თუმცა, ცოტამ თუ იცის საიდან მოდის ამ სიტყვის ისტორია.

უმეტესობა მიიჩნევს, რომ სიტყვა "სიმონ" არის ქუჩური ჟარგონი და არანაირი განმარტება არ აქვს.

სინამდვილეში სიტყვა "სიმონ" მე-20 საუკუნის საქართველოში გვაბრუნებს, სადაც რუსული რეჟიმი იყო გამეფებული და აქტიურად მიმდინარეობდა ქართული ეკლესია-მონასტრების ნგრევა საბჭოთა ხელისუფალთა მიერ.

იმ დროს საქართველოში იყო ასეთი მღვდელმსახური სიმონ მჭედლიძე, რომელიც ღრმად მორწმუნე ქრისტიანი იყო და ქადაგებდა ქრისტეს, სამშობლოს და წინააღმდეგი იყო საბჭოური რეჟიმის. 

ის ასევე იყო გაზეთ "შინაური საქმეები" - ს წევრი, სადაც დაუფარავად უარყოფდა საბჭოურ რეჟიმს.

ამის გამო ის ქუთაისიდან გააძევეს და აუკრძალეს იქ ჩასვლა.

სიმონი თავის მშობლიურ სოფელ სვირში წავიდა და იქ სკოლა გახსნა.

ამ დროისთვის, უკვე იმერეთში არის დანგრეული ბევრი ეკლესია, მათ შორის სობოროც.

1924 წელს სოფელ როდინაულში რუსებმა დაანგრიეს მაცხოვრის სახელობის ეკლესია და მის ადგილას დადგეს თეატრი. 

მოსახლეობა ძალიან გაანაწყენა ამ ფაქტმა და ბოლომდე იბრძოლეს ეკლესიის დასაბრუნებლად.

ამ შრომამ შედეგი გამოიღო და ეკლესია თავიდან აღდგა. 

მხოლოდ ეკლესიის კურთხევაღა იყო დარჩენილი, რომ მაშინდელმა ეპისკოპოსმა ნაზარ ლეჟავამ თავისი მოძმე მღვდლებთან ერთად გადაწყვიტა სოფელ როდინაულში ჩასვლა. 

იმავე დღის მეორე ნახევარში სიმონ მჭედლიძემ, ნაზარ ლეჟავამ და მოძმე მღვდლებმა აკურთხეს ეკლესია. 

დაღლილმა ბერებმა კი ამის შემდეგ დაძინება გადაწყვიტეს.

და აი, დადგა საბედისწერო ღამე, როდესაც "ჩეკისტები" ბერებს თავს დაადგნენ და დააპატიმრეს.

ისინი ერთ დილეგში დაატყვევეს და ერთი თვის მანძილზე აწამებდნენ.

წამების დროს, სიმონ მჭედლიძეს ასეთი სიტყვებით მიმართავდნენ ჯალათები:

"გტკივა სიმონ?"

"არა სიმონ?"

"აბა ახლა რას იტყვი სიმონ?"...

თავად ჩეკისტებიც გაოცებულები იყვნენ სიმონის გამძლეობითა და შეუპოვრობით, სწორედ მათგან გავარდა ხმა სიტყვა "სიმონ"-ზე და ეს სიტყვა იყო, როგორც გამძლეობის და ამტანობის სიმბოლო.

საფიჩხიის ტყეში დახვრეტილ სასულიერო პირებს შორის გახლდათ მღვდელი სიმონ მჭედლიძეც, იმ ხუთთაგანი, სასტიკად ნაგვემები და თოკით ერთმანეთზე გადაბმულები 1924 წლის მარიამობა ღამეს რომ დახვრიტეს, ხოლო შემდეგ ტყვია ნასროლებს და ჯერაც ცოცხლებს მიწა მიაყარეს.

სამწუხაროდ, მათი საფლავების ადგილმდებარეობა დღემდე უცნობია.

ეკლესიამ სიმონ მჭედლიძე "ახალმოწამედ" შერაცხა.

ასევე დაგაინტერესებთ:

🔲 "გიორგის აქვს მოყოლილი როგორ მეგობრობდა ჯაბა იოსელიანის შვილთან – რატომ გვიკვირს ეროვნული შერიგება?" – ნანუკა ჟორჟოლიანი