საქართველოში ოჯახის სიწმინდისა და სიმტკიცის დღე აღინიშნა

დღეს საქართველოში ოჯახის სიწმინდისა და სიმტკიცის დღე აღინიშნა.

სასულიერო პირებმა, თურქეთიდან თბილისში, აწყურის ღვთისმშობლის ხატი შემოაბრძანეს, რომელიც ჯერ სვეტიცხოვლის ტაძარში, ხოლო შემდეგ ქაშუეთში დაასვენეს, სადაც პატრიარქის მოსაყდრემ სენაკისა და ჩხოროწყუს მიტროპოლიტმა შიომ (მუჯირი) პარაკლისი გადაიხადა.

„გილოცავთ, ძვირფასო მამებო, ძმებო და დებო, ამ შესანიშნავ დღესასწაულს, ბედნიერ დღეს. ძალიან ამაღლებული განწყობით ვართ ყველა. კიდევ ერთხელ ვფიქრობთ ოჯახის სიწმინდეზე, რომ ეს არის ღვთის მიერ მოცემული ნიჭი, ღვთისგან დადგენილი ცხოვრებისა და ყოფიერების წესი. ამიტომ ჩვენ, როგორც უკვე ვთქვით ქაშუეთის ტაძართან, როდესაც ვსაუბრობთ ტრადიციული ღირებულებების დაცვაზე, უნდა გვახსოვდეს, რომ ეს ღირებულება - ოჯახური ფასეულობა და ოჯახური ცხოვრება - ტრადიციულია არა იმ გაგებით, რომ ჩვენი წინაპრების მიერ შეთხზული და დადგენილია, არამედ ტრადიციულია იმ გაგებით, რომ ტრადიციის წყარო და საწყისი არის თავად ყოვლად წმინდა სამება.

აი, ამიტომ არის ეს ძვირფასი ჩვენთვის და ამიტომ ყველაფერი უნდა გავაკეთოთ, რომ ეს სიწმინდე შევინარჩუნოთ, რადგან ხელყოფა ოჯახისა, ეს არის ხელყოფა და გადაშენება ერისა; როგორიც არის ოჯახის მდგომარეობა, ისეთია ერის მდგომარეობაც.

ამიტომ უფალმა ინებოს, ყოვლად წმინდა ღვთისმშობლის მეოხებითა და მფარველობით, ჩვენს ერში ოჯახის აღორძინება და გადარჩენა, ჩვენი ერი გამთლიანება და გადარჩენა, ამინ", - განაცხადა მეუფე შიომ.

ქაშუეთიდან ლოცვითი მსვლელობა გაიმართა.

სიონში, საპატრიარქოსთან მისული მრევლი კი პატრიარქმა დალოცა.

სრულიად საქართველოს კათოლიკოს-პატრიარქის, უწმინდესისა და უნეტარესის ილია II-ის ლოცვა-კურთხევით, 17 მაისი ოჯახის სიწმინდისა და მშობლების პატივისცემის დღედ 2014 წელს გამოცხადდა.

ასევე დაგაინტერესებთ:

* მეუფე შიო: ქორწინება არის ერთ-ერთი უმთავრესი ნიშან-თვისება ადამიანისა, რითაც ჩვენ განვსხვავდებით პირუტყვებისგან

* „ვინც მაშინ „სირცხვილის დერეფნებს” აწყობდა, დღეს მათ რომ უვარდებიან ეთერში, აღშფოთებულები არიან ამ ფაქტით“ - ეკა ქადაგიშვილი