დავით ქართველიშვილი რადიკალების გეგმებზე: ნაც-ადვოკატები ფაქტობრივად დანაშაულის ჩადენისკენ აქეზებენ თავის „ბაბლს“, განზრახ შეცდომაში შეჰყავთ ისინი

 ვერც დაგვღლით თქვენი შიზოფრენიული პერფორმანსებით და ვერც დაგვაშინებთ „მონური" თუ „რუსული“ პარანოიდალური შეძახილებით. ამ ქვეყანაში ყველას გადარჩენის - გინდ ფიზიკურად, გინდ ფსიქიატრიულად, გინდ სულიერად - არც ვალდებულება და არც უზენაესი დათქმები არ არსებობს, - წერს სოციალურ ქსელში „ხალხის ძალის“ წევრი დავით ქართველიშვილი და ოპოზიციის გადაწყვეტილებას, გადაკეტონ თბილისის შემოსასვლელი მაგისტრალი, ეხმიანება.

ექსპერტი წერს, რომ აქციის მონაწილეები შეცდომაში შეჰყავთ თავიანთ დამკვეთებს, როცა ეუბნებიან, რომ ცენტრალური მაგისტრალის გადაკეტვის გამო სადამსჯელო ნორმები ჯერ არ შესულა ძალაში. ქართველიშვილი აღნიშნავს, რომ ნაც-ადვოკატები მათ ფაქტობრივად დანაშაულის ჩადენისკენ აქეზებენ.

„დღეს თბილისში დედას ვეფერები მის დაბადების დღეზე, საღამოს კი შვილიშვილებს შევპირდი, ძეგვში მამიკოს საფლავზე ერთად ავიდეთ - მათ დარგულმა ყოჩივარდებმა გაიხარეს. შემოვლითი გზით წამოდიო, მირჩიეს - „კონიაკის დასახლება", ავჭალა, მცხეთა და ა.შ. "პეროვნებებმა" სახლისკენ მიმავალი გზა უნდა გადამიკეტონ თურმე. გამორიცხულია, მათ დაკრულზე „შემოვლით გზებს" ვირჩევდე ამ დარჩენილ წუთისოფელში. შანსი არაა!
დღეს მათი ნაც-ადვოკატები ფაქტობრივად დანაშაულის ჩადენისკენ აქეზებენ თავის „ბაბლს", განზრახ შეცდომაში შეჰყავთ ისინი - გადაკეტეთო მაგისტრალი, ამისთვის სისხლის სამართლებრივი პასუხისმგებლობა „ვალენტინობა" დღიდან შედისო ძალაში. არა და, მშვენივრად იციან, რომ მეორე დღეა რაც კანონიერ ძალაში შესულია ეს სამართლებრივი ნორმა.

ასეთი გზით „პოლიტპატიმრების" გამრავლება ვერ გიშველით. პირველ რიგში, ვერ გიშველით „თვით სტრასბურგიც" კი, რომელიც დაღალეთ ჯერ კიდევ 2004-2012 წ.წ. ადამიანის უფლებების კონვენციის უკლებლივ ყველა მუხლის დარღვევით და შემდგომ წლებში უკვე თქვენი ბელადის და მისი სექტანტების არაერთი თაღლითობით. სწორედ სტრასბურგმა გამხილათ „"სისტემური ძალადობის რეჟიმის" შექმნაში და დღეს სტრასბურგს გინდათ უჩივლოთ - საქართველოში კანონს იცავენო? „წარმატებები"!

ასე რომ, არანაირი „შემოვლითი" გზები - თქვენთვის შესაფერისი ადგილების მისაჩენად. ვერც დაგვღლით თქვენი შიზოფრენიული პერფორმანსებით და ვერც დაგვაშინებთ „მონური" თუ „რუსული" პარანოიდალური შეძახილებით. ამ ქვეყანაში ყველას გადარჩენის - გინდ ფიზიკურად, გინდ ფსიქიატრიულად, გინდ სულიერად - არც ვალდებულება და არც უზენაესი დათქმები არ არსებობს. ვისაც გადარჩენა და ცხონება გვამოძრავებს - ყველას გატარება მოგიწევთ. მხოლოდ პირდაპირი და არანაირი შემოვლითი გზებით“, - წერს დავით ქართველიშვილი.