გამჭვირვალობა: სახელმწიფომ პანდემიის დროს სამშენებლო შესყიდვებზე 125 მილიონი ლარის პირდაპირი კონტრაქტები გააფორმა

„გამარტივებული შესყიდვის გზით სამშენებლო მომსახურებაზე გაფორმებული კონტრაქტებიდან 33.8 მლნ ლარის ჯამური ღირებულების კონტრაქტები პარტია „ქართული ოცნების“ და სალომე ზურაბიშვილის შემომწირველების კომპანიებზე მოდის“, - ნათქვამია „საერთაშორისო გამჭვირვალობა - საქართველოს“ კვლევაში.

„საერთაშორისო გამჭვირვალობა - საქართველომ” პანდემიის პერიოდში სამშენებლო სექტორში სახელმწიფოს მიერ დადებული გამარტივებული შესყიდვების კონტრაქტები შეისწავლა. 

როგორც ორგანიზაციის კვლევაშია საუბარი, 2020 წლის პირველი ივნისიდან 2021 წლის 15 სექტემბრამდე სახელმწიფომ სამშენებლო მომსახურების შესყიდვის 125 მლნ ლარამდე ჯამური ღირებულების 4 500-მდე პირდაპირი კონტრაქტი გააფორმა, აქედან 33.8 მლნ ლარის ჯამური ღირებულების კონტრაქტები პარტია „ქართული ოცნების“ და სალომე ზურაბიშვილის შემომწირველების კომპანიებზე მოდის, რომელთაც 2016-2021 წლებში მმართველი პარტიის სასარგებლოდ 1.1 მლნ ლარზე მეტი გაიღეს.

ორგანიზაციაში ამბობენ, რომ, საანგარიშო პერიოდში პირდაპირი შესყიდვის გზით კონტრაქტები 72-მა ახლად დაფუძნებულმა კომპანიამ მიიღო.

43-მა კომპანიამ კონტრაქტები დაფუძნებიდან 3 თვეზე ნაკლებ დროში მიიღო, ხოლო 8 კომპანიას კონტრაქტი დაფუძნებიდან მაქსიმუმ 10 დღეში გაუფორმდა.

2 კომპანია - შპს „ბურღი“ და შპს „ხარისხი 2021“ ერთი დღის დაფუძნებული იყო, როცა ჯამში 243 000 ლარის კონტრაქტები მიიღეს. - წერია კვლევაში.

ორგანიზაცია ხელისუფლებას რეკომენდაციით მიმართავს და აღნიშნავს, რომ კორუფციის ნიშნების შემცველი სახელმწიფო შესყიდვების კონტრაქტებით საგამოძიებო უწყებები უფრო მეტად უნდა ინტერესდებოდნენ;

ასევე შემსყიდველმა ორგანიზაციებმა ახლად დაფუძნებულ, გამოუცდელ კომპანიებთან გამარტივებული სახელმწიფო შესყიდვების კონტრაქტების დადებასთან მაქსიმალურად უნდა შეიკავონ თავი, ან ასეთი გადაწყვეტილებები ჩვეულებრივზე უფრო მაღალი სტანდარტით დაასაბუთონ. - წერს „საერთაშორისო გამჭვირვალობა საქართველო“.

ასევე დაგაინტერესებთ:

🔵 დადგინდა მოპედებისა და მსუბუქ კვადროციკლების მართვის მოწმობის ახალი კატეგორია "AM" - თეორიულ გამოცდაზე პირველადი გასვლა უფასო იქნება

🔵სამანტა იყო კაცი, ტომი კი ქალი - ტრანსგენდერი წყვილის ქორწინება იტალიაში