ირაკლი ზარქუა: უსამშობლოები და უცხო პატრონების მესიჯის ამარა დარჩენილები, ზუსტად ვერ ამბობენ, მიიღებენ თუ არა მონაწილეობას თვითმმართველობის არჩევნებში, როგორც დაუკვეთენ პატრონები, ისე მოიქცევიან

 ახლა ვინც არიან უსამშობლოები და უცხო პატრონების მესიჯის ამარა დარჩენილები, ზუსტად ვერ ამბობენ, მიიღებენ თუ არა მონაწილეობას [ადგილობრივი თვითმმართველობის არჩევნებში], შემდეგ სიტყვათა თამაშით ცდილობენ ლავირებას, რომ აიცდინონ ამ კითხვაზე პასუხი, - განაცხადა პარლამენტის დიასპორის საკითხთა კომიტეტის თავმჯდომარემ, ირაკლი ზარქუამ.

ზარქუას თქმით, როგორი დაკვეთაც იქნება პატრონებისგან, ოპოზიციაც ზუსტად ისე იმოქმედებს. მან ოპოზიციურ გაერთიანებას უთავმოყვარეობის და უპრინციპობის პიკი უწოდა და აღნიშნა, რომ ისინი, ვინც ერთმანეთს აგინებდნენ, მაგალითად, გახარია და ხაზარაძე, ან ელისაშვილი და ხაზარაძე, ახლა, პატრონების სურვილის თანახმად, ერთად არიან.

„რეალურად, როგორც დაუკვეთენ მათი პატრონები, ზუსტად ისე მოიქცევიან: ეტყვიან, რომ უნდა მიიღო მონაწილეობა არჩევნებში - მიიღებენ მონაწილეობას, ეტყვიან, გაერთიანდი იმასთან, ვისაც დღეს აგინებ - გაერთიანდებიან. ჩვენთან ხაზარაძეს რა პრობლემა ჰქონდა, გახარია დამემუქრა, წერილი მომწერა ანაკლიის თემაზეო, არ გახსოვთ, მაგასთან დაკავშირებით ჰქონდა პრეტენზია - დღეს ერთად არიან. გახსოვთ, ასევე, „კინტო“ რომ გვყავდა პარლამენტში, ელისაშვილი, შუაში ვიდექით, რომ ერთმანეთი არ გაელახათ, ახლა ერთად არიან. ანუ უთავმოყვარეობის, უპრინციპობის პიკია ამ გაერთიანებაში, რატომ? იმიტომ, რომ იქიდან მოდის დაკვეთა, რომელსაც წინ ვერავინ აღუდგება. უნდა შეასრულონ ის, რასაც დაუკვეთენ მათი პატრონები. შესაბამისად, ახლა სწორ პასუხს ვერც ხაზარაძე გაგცემთ, ვერც „ჩახდილები“ - „გირჩები“, ვერც „ნაცები“ და ვერც დანარჩენები. ზუსტად არ იციან, ეტყვიან - მიიღებენ მონაწილეობას, ეტყვიან - არ მიიღებენ მონაწილეობას, ეს არის რეალობა“, - განაცხადა ირაკლი ზარქუამ.