ნიკოლოზ სამხარაძე - მსოფლიო საპარლამენტო კავშირს არაღიარების პოლიტიკის გამტკიცებისთვის ვიყენებთ, აქ ვხვდებით აზიის, აფრიკის, ლათინური ამერიკის ქვეყნების წარმომადგენლებს

 მსოფლიო საპარლამენტო კავშირის ასამბლეას არაღიარების პოლიტიკის გამტკიცებისთვის ვიყენებთ, რადგან ეს არის შესაძლებლობა, რომ აზიის, აფრიკის, ლათინური ამერიკის ქვეყნების წარმომადგენლებს შევხვდეთ, – ამის შესახებ პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ განაცხადა.

მისი თქმით, შეხვედრები ასევე ევროპულ დელეგაციებთანაც იქნება, სადაც უშუალოდ საქართველოსა და ევროკავშირს შორის არსებულ ურთიერთობებზე იქნება საუბარი.

„დღეს, ტაშკენტში, საპარლამენტო დელეგაციის ვიზიტი იწყება, სადაც მსოფლიო საპარლამენტო კავშირის 150-ე ასამბლეა ტარდება. ეს არის ყველაზე დიდი საპარლამენტთაშორისო პლატფორმა, რომელიც მსოფლიოში არსებობს და აერთიანებს გაერო-ს თითქმის, ყველა სახელმწიფოს. შესაბამისად, შესაძლებლობა გვექნება, რომ სხვადასხვა ქვეყნის საპარლამენტო დელეგაციებს შევხვდეთ, მათ შორის პარლამენტის თავმჯდომარეებს, წევრებს. რა თქმა უნდა, ძირითადად, ამ ფორუმს არაღიარების პოლიტიკის გამტკიცებისთვის ვიყენებთ, რადგან ეს არის შესაძლებლობა, რომ აზიის, აფრიკის, ლათინური ამერიკის ქვეყნების წარმომადგენლებს შევხვდეთ. რა თქმა უნდა. შეხვედრები ასევე ევროპულ დელეგაციებთანაც გვექნება, სადაც უშუალოდ საქართველოსა და ევროკავშირს შორის არსებულ ურთიერთობებზე ვისაუბრებთ, მათ შორის იმ პრობლემატიკაზეც, რომელიც არსებობს, ასევე სამომავლო ხედვებზე. აქედან გამომდინარე, მნიშვნელოვანი ფორუმია და საინტერესო და ნაყოფიერ დისკუსიებს ველოდებით“, – განაცხადა ნიკოლოზ სამხარაძემ.

საქართველოს პარლამენტის თავმჯდომარის, შალვა პაპუაშვილის ხელმძღვანელობით, საპარლამენტო დელეგაცია 5-8 აპრილს საპარლამენტთაშორისო კავშირის (IPU) 150-ე ასამბლეის მუშაობაში მიიღებს მონაწილეობას, რომელიც უზბეკეთის დედაქალაქ ტაშკენტში გაიმართება.