ლევან მაჭავარიანი: ახალგაზრდებს რომ ატყუებენ, თითქოს, „ქართული ოცნებაა“ რეჟიმი, მათ უნდა უყურონ საგამოძიებო კომისიის მუშაობას და მერე გაავლებენ პარალელს, რას ნიშნავს ავტორიტარული და ტოტალიტარული რეჟიმი და რას ნიშნავს დემოკრატია

 საგამოძიებო კომისიის შექმნა სასიცოცხლოდ მნიშვნელოვანი იყო. ჩვენ ხშირად ვსაუბრობთ, რომ ძალიან ბევრი მხარდამჭერი გვსაყვედურობდა, რატომ არ ვაკეთებდით ამას მანამდე, იყო რაღაც გარემოებები და ჩვენი მოქალაქეები შემოდიან ჩვენს მდგომარეობაში. მანამდე ვერ შევძელით, იმიტომ, რომ სამწუხაროდ, წლების წინ იმდენი პოლიტიკური ჯანი არ გვქონდა, რამდენიც დღეს გვაქვს, - განაცხადა საპარლამენტო უმრავლესობის წევრმა, ლევან მაჭავარიანმა.

როგორც მან აღნიშნა, პარლამენტის დროებითი საგამოძიებო კომისიის მუშაობის ერთი მიზანია სამართლებრივი შეფასება მიეცეს ყველა დანაშაულს, ხოლო, მეორე მიზანია, ახალგაზრდებმა, რომლებსაც ატყუებენ, თითქოს „ქართული ოცნება“ რეჟიმია, უყურონ კომისიის სხდომებს და თავად გაავლონ პარალელი რას ნიშნავს ავტორიტარული და ტოტალიტარული რეჟიმი და რას ნიშნავს დემოკრატია.

„ჩვენი მოქალაქეები აკვირდებიან, მით უმეტეს, ბოლო სამი წლის განმავლობაში, როგორ ნაბიჯებს დგამს „ქართული ოცნება“. ჩვენ ვართ დამოუკიდებლები ჩვენს გადაწყვეტილებებში, ჩვენი სუვერენიტეტი არის ისეთი მყარი, როგორც არასდროს ყოფილა და შესაბამისად, დამოუკიდებლად ვდგამთ ნაბიჯებს და ყველა გადაწყვეტილებას, რაც ჩვენს ქვეყანას შეეხება, ვიღებთ საქართველოშივე.

კომისიის მუშაობას აქვს ორი დატვირთვა. პირველი, აუცილებელია, სამართლებრივი შეფასება მიეცეს ყველა დანაშაულს, მით უმეტეს, ჩვენ ვალდებულები ვართ იმ ათიათასობით ოჯახის წინაშე, ვინც თავის თავზე იწვნია ეს უსამართლობა და ჩაგვრა და პირდაპირი მნიშვნელობით შეიწირა ოჯახების წევრები. მეორე დატვირთვა ის არის, დღეს რომ ახალგაზრდებს ატყუებენ, თითქოს, „ქართული ოცნება“ არის რეჟიმი, ამ ახალგაზრდებმა უნდა უყურონ ამ კომისიის მუშაობას პირდაპირ ეთერში, ვთხოვ არ დაიზარონ და მერე გაავლებენ პარალელს, რას ნიშნავს ავტორიტარული და ტოტალიტარული რეჟიმი და რას ნიშნავს დემოკრატია“, - განაცხადა ლევან მაჭავარიანმა.