ლევან მაჭავარიანი: ჩვენი რეიტინგის ზრდა არ გაგვკვირვებია, ვინაიდან მოქალაქეებმა დაინახეს, რომ მიუხედავად ამ წნეხისა და ზეწოლისა, „ქართული ოცნების“ პირობებში ამ ქვეყანაში მშვიდობა და სტაბილურობა გარანტირებულია

ჩვენი რეიტინგის ზრდა არ გაგვკვირვებია, ვინაიდან ჩვენმა მოქალაქეებმა დაინახეს, რომ მიუხედავად ამ წნეხისა და ზეწოლისა, „ქართული ოცნების“ პირობებში ამ ქვეყანაში მშვიდობა და სტაბილურობა გარანტირებულია, ეკონომიკური ზრდა, რომელიც ბოლო 4 წლის განმავლობაში გვაქვს, რომელზედაც მხოლოდ ჩვენ არ ვსაუბრობთ, რომ ეს ზრდა გაგრძელდება მინიმუმ 2030 წლამდე და ძალიან დიდი ალბათობით 5 წელიწადში საქართველო გადავა მაღალ შემოსავლიანი ქვეყნების რიცხვში, - განაცხადა ფრაქცია „ქართული ოცნების“ თავმჯდომარის მოადგილემ ლევან მაჭავარიანმა.

„ბატონმა ტრამპმა რაც დაიკავა ოვალური ოფისი, ჩვენი მოქალაქეები აკვირდებიან, რომ ძალიან ბევრი რაღაც გამომჟღავნდა ისეთი, რაზედაც „ქართული ოცნება“ სამი წლის განმავლობაში საუბრობდა. ჩვენი მოქალაქეების გარკვეულ ნაწილს რაღაცების არ სჯეროდათ, მაგრამ გამომჟღავნდა, რომ თურმე რაზედაც ვსაუბრობდით სამი წლის განმავლობაში და რა ნაბიჯებსაც ჩვენ ვდგამდით, როგორი ფრთხილი და პრაგმატული პოლიტიკაც გვქონდა, ეს ყველაფერი იყო აბსოლუტურად უალტერნატივო.

როდესაც მოქალაქეები აკვირდებოდნენ, თუ რაში იყო საქმე გამჭვირვალობის ქართულ კანონთან, ვინაიდან იმ კანონს უწოდეს რუსული, მოქალაქეების გარკვეული ნაწილი შეცდომაში შეიყვანეს და ატყუებდნენ. ერთ წელზე მეტი გავიდა და მოსახლეობა დარწმუნდა, რომ რა მოლოდინებსაც ისინი გამოთქვამდნენ, არაფერი არ მოხდა. მსგავსი სცენარი განვითარდა ნოემბრის და დეკემბრის აქციებზე, სადაც ასევე დარწმუნდა მოსახლეობა, რომ სიმართლე „ქართული ოცნების“ მხარეს იყო“, - აღნიშნა ლევან მაჭავარიანმა.