მსოფლიოს ორგზის ჩემპიონი, ელენე ქებაძე წულუკიანის უწყებას უყურადღებობაში ადანაშაულებს

საქართველოს კულტურის, სპორტისა და ახალგაზრდობის სამინისტროს უყურადღებობაში ადანაშაულებს მსოფლიოს ორგზის ჩემპიონი, სამბისტი ელენე ქებაძე. სპორტსმენი ფეისბუკგვერდზე წერს, რომ სამინისტრომ 13 ნოემბერს გამოქვეყნებული მილოცვა უკან წაიღო და პოსტი წაშალა.

„სამწუხაროა, როდესაც მსოფლიო ჩემპიონი ხდები უკვე მეორედ და სპორტის სამინისტროდან აეროპორტშიც კი არავინ გხვდება, აღარაფერს ვამბობ პირადად შეხვედრაზე, მით უმეტეს მაშინ, როდესაც სპორტის მინისტრი ქალბატონია.

კარგი, ალბათ არ სცალიათ, ყველაფერი გასაგებია. შესაძლებელია, რომ ყველაფერს თავისი ახსნა მოვუძებნოთ, მაგრამ იმ ფაქტზე რას იტყვით, როდესაც სპორტის სამინისტრო მოგილოცავს ფეისბუკზე და დღეს ვნახულობთ, რომ ეს პოსტი წაშლილია?! ძალიან სამარცხვინოა, რომ მილოცვა უკან წაიღეს.
არაუშავს, მე ვაგრძელებ ვარჯიშს და ყველაფერს გავაკეთებ იმისთვის, რომ ჩემი გულშემატკივარი და სრულიად საქართველო კიდევ ბევრჯერ გავახარო და ვასახელო!“, – წერს ელენე ქებაძე.

საკითხზე „ფორტუნა“ კულტურის, სპორტისა და ახალგაზრდობის სამინისტროს დაუკავშირდა. უწყების განმარტებით, მილოცვა კულტურის სამინისტროს გვერდზე არავის წაუშლია.

„სამინისტროს გვერდზე კვლავაც განთავსებულია მისალოცი პოსტი და ამგვარი განცხადების გაკეთებამდე გთხოვთ, გადაამოწმოთ ინფორმაცია“. – ნათქვამია კულტურის სამინისტრო ოფიციალურ განცხადებაში.

ელენე ქებაძე ყირგიზეთის დედაქალაქ ბიშკეკში მიმდინარე სამბოს მსოფლიო ჩემპიონატის გამარჯვებული გახდა. ქართველი სამბისტი +80 კგ წონით კატეგორიაში ასპარეზობდა და ფინალში სამბოს საერთაშორისო ასოციაციის სახელით მოასპარეზე ანჟელა გასპარიანის დამარცხება მოახერხა.

28 წლის სპორტსმენმა მსოფლიო ჩემპიონატის მოგება პირველად 2018 წელს, რუმინეთის დედაქალაქ ბუქარესტში შეძლო. გარდა ამისა, სხვადასხვა დროს ელენე ქებაძეს ახალგაზრდული ევროპისა და მსოფლიო ჩემპიონატიც აქვს მოგებული.

ასევე დაგაინტერესებთ:

🔵 ზელენსკიმ საქართველოს მიმართა სააკაშვილი გადაიყვანონ უკრაინის, ევროპის ან აშშ-ის კლინიკაში

🔵 "არც ეს გრიპი მიმაჩნია არაფრად. მე ახლაც სხვა რამ მაღელვებს ქიმიური, ბაქტეოროლოგიური ომი... და შენ წარმოიდგინე, სეზონური გრიპებიც" - კაკულიას მორიგი წინასწარმეტყველება