„ნაციონალური მოძრაობა“ როდესაც ხელისუფლებაში იყო, პატიმრებს დაკითხვების დროს აფურთხებდნენ სახეში. მოუწოდებენ მზარეულებს რესტორნებში, რომ იგივე გააკეთონ“ - ბიძინა გიორგობიანი

„ნაციონალური მოძრაობა“, როდესაც ხელისუფლებაში იყო, პატიმრებს დაკითხვების დროს აფურთხებდნენ სახეში. ახლა ამას ვეღარ შვრებიან, ისვრიან კვერცხებს და მოუწოდებენ მზარეულებს რესტორნებში, რომ იგივე გააკეთონ, - განაცხადა საზოგადოებრივი მოძრაობა „ერთიანი ნეიტრალური საქართველოს“ ერთ-ერთმა დამფუძნებელმა ბიძინა გიორგობიანმა გადაცემაში „დღის ქრონიკა“, რითაც რესტორან „ბაბილოში“ მომხდარ ინციდენტს გამოეხმაურა.

მისი თქმით, რადიკალების ხელწერა უცვლელია და ისინი მუდმივად ცდილობენ შემოიტანონ ქაოსი და არეულობა.

„გარედან მართულია ეს პროცესი, გარედან მართულები არიან ეს პარტიები, რომლებიც განგრძობით დანაშაულის სჩადიან ქვეყნის წინაშე. მაშინ, როდესაც ხელისუფლებაში იყვნენ, 2004-2012 წლებში, მაშინ სხვა მეთოდებით სჩადიოდნენ ამ დანაშაულს და რაც ოპოზიციაში არიან - სხვა მეთოდებით. განსხვავება რაშია? განსხვავება იმაშია, რომ როდესაც მათ ჰქონდათ საშუალება, რომ ესროლათ პარლამენტისთვის, პირველი პარლამენტისთვის - გვესროლეს. პეჩორის დივიზიის ხალხი ჩამოიყვანეს, მფრინავი ღამურები, ტანკები, ზემოდან მფრინავებიც გვესროდნენ, ჩამოაგდეს ბენზინით სავსე ხუთტონიანი ცისტერნა და ა.შ. ეს იყო ომი. გადამწვარი იყო მთელი თბილისი. მათ ამის საშუალება ახლა არ აქვთ, მაგრამ სიმბოლურად პიროტექნიკას მაინც ისვრიან, რომ დაწვან ის რამენაირად. როდესაც ხელისუფლებაში იყვნენ „ნაციონალური მოძრაობის“ ხალხი, „ნაციონალური მოძრაობა“ იმათი შთამომავლები იყვნენ, ვინც თბილისში გააკეთა სამხედრო გადატრიალება. „ნაციონალური მოძრაობა“, როდესაც ხელისუფლებაში იყო, პატიმრებს დაკითხვების დროს აფურთხებდნენ სახეში. ახლა ამას ვეღარ შვრებიან და ისვრიან კვერცხებს და მოუწოდებენ მზარეულებს რესტორნებში, რომ იგივე გააკეთონ.

გამოსავალი ის, რომ ხელისუფლებამ მათ რამე დაუთმოს, ისინი დათმობად კი არ აღიქვამენ ამას, ისინი მიყიდიან თავის ნერვული პარალიზებად მოწამლულ ამომრჩევლებს, რომლებიც ჰყავთ სამწუხაროდ, მიყიდიან რომ ჩვენ დავაჩოქეთ ხელისუფლება და ეს დავათმობინეთ“, - განაცხადა ბიძინა გიორგობიანმა.

მისი თქმით, ხელისუფლება სწორ პოზიციაზეა და რადიკალებისგან განსხვავებით ქვებს არ ისვრის.