"საირმე" გაფიცულ თანამშრომლებს ცრუ ინფორმაციის გავრცელებაში ადანაშაულებს - გაფიცულები აქციისთვის ემზადებიან

კომპანია "საირმის" გაფიცული თანამშრომლები 26 თებერვალს, დღის ორ საათზე მასშტაბურ საპროტესტო აქციას გეგმავენ - კომპანია განცხადებას ავრცელებს და ამბობს, რომ გაფიცულებს საზოგადოება შეცდომაში შეჰყავთ არასწორი ინფორმაციის გავრცელებით.

ინფორმაციას "რადიო თავისუფლება" ავრცელებს:

კომპანია ამ დროისთვის არასრული დატვირთვით მუშაობს და გაფიცულ თანამშრომლებს ჰპირდება, რომ თუკი სამსახურში დაბრუნდებიან, კუთვნილს ხელფასს მიიღებენ.

აგრომეურნეობის, ვაჭრობისა და მრეწველობის პროფკავშირი თვლის, რომ გაფიცვის დასრულებისთვის საჭიროა მოთხოვნების შესრულება, რომელთაგან უმთავრესია ხელფასების 30%-იანი ზრდა და შრომითი პირობების გაუმჯობესება.

"შპს „საირმე მინერალ ვოთერსის“ ქარხნის ტერიტორიაზე პროფკავშირების წარმომადგენლის გიორგი დიასამიძის ორგანიზებით, უკვე მე-12 დღეა გრძელდება ქარხნის თანამშრომლების ნაწილის გაფიცვა.

ამ ხნის განმავლობაში, მათი მხრიდან არაერთი ცრუ ინფორმაცია გაჟღერდა, მათ შორის, ერთ-ერთი დიდი აქცენტი თანამშრომელთა ხელფასების მცირე ოდენობაზე კეთდება. ცხადია, ეს საკითხი მეტ სოლიდარობას იწვევს, რაც უფრო დამაჯერებელს ხდის მათ მოთხოვნებს და მათ შორის ისეთ გზავნილებსაც, თითქოს საწარმო გაჩერებული და პარალიზებულია. გავრცელებული ინფორმაცია არ შეესაბამება სიმართლეს. თანამშრომლების ნაწილი სამსახურშია, შესაბამისად, ქარხანა განაგრძობს მუშაობას ორ ცვლაში" - ნათქვამია კომპანიის დღეს, 24 თებერვალს გავრცელებულ განცხადებაში.

ამ დროისათვის, საირმის გაფიცული თანამშრომლების მოთხოვნები, ხელფასის 30%-იანი ზრდის გარდა, არის:

საქსტატის მონაცემების შესაბამისად ხელფასების ყოველწლიურ ინდექსაცია;

საპენსიო გადასახადის დამსაქმებლის მიერ დაფარვა;

ღირსეული და უსაფრთხო შრომით პირობები;

მოწესრიგდეს ანტისანიტარიის პრობლემა ქარხანაში;

აიკრძალოს დამსაქმებლის მხრიდან შანტაჟი და მუქარა;

გაფორმდეს კოლექტიურ შეთანხმება;
მენეჯმენტის ბრალეულობის გამო არ მოხდეს დასაქმებულთა იძულებითი მოცდენა;

დამფუძნებლებთან შეხვედრა, რადგან დასაქმებულებს მიაჩნიათ, რომ ადგილობრივი მენეჯმენტი განზრახ აზიანებს და აკოტრებს ქარხანას;

გაფიცვის პერიოდში არ მოხდეს გაფიცული თანამშრომლების სხვა კადრებით ჩანაცვლება.

ასევე დაგაინტერესებთ:

*სპეციალურმა საგამოძიებო სამსახურმა თბილისში ოჯახის გამოსახლების ფაქტზე გამოძიება დაიწყო