სესი: 2025 წელს რძისა და რძის მწარმოებელ კომპანიებსა და სარეალიზაციო ობიექტებში 4786 სახელმწიფო კონტროლი განხორციელდა, დარღვევების მაჩვენებელმა აპრილის მონაცემებით 3,3% შეადგინა

სურსათის ეროვნულ სააგენტოში რძის მწარმოებელ ბიზნესოპერატორებთან და ასოციაციების წარმომადგენლებთან სამუშაო შეხვედრა გაიმართა. აღნიშნულის შესახებ ინფორმაციას სესი ავრცელებს.

სააგენტოს ცნობით, შეხვედრისას, რომელშიც სექტორის 40-მდე წარმომადგენელი მონაწილეობდა, ხაზი გაესვა ბიზნესოპერატორისა და სააგენტოს ვალდებულებებს, თანამშრომლობასა და საერთო ძალისხმევას, რაც უზრუნველყოფს სარეალიზაციო ქსელში განთავსებული რძისა და რძის პროდუქტების უვნებლობასა და საიმედოობას.

სურსათის ეროვნული სააგენტოს უფროსმა ზურაბ ჩეკურაშვილმა ყურადღება კონტროლის მექანიზმებზე გაამახვილა და აღნიშნა, რომ მიმდინარე 2025 წელს სურსათის ეროვნულმა სააგენტომ რძისა და რძის მწარმოებელ კომპანიებსა და სარეალიზაციო ობიექტებში 4786 სახელმწიფო კონტროლი განახორციელა; დარღვევების მაჩვენებელმა, აპრილის მონაცემებით, 3,3% შეადგინა.

გარდა ამისა, აქტიურად მიმდინარეობს ნედლი რძის კვლევა სხვადასხვა მაჩვენებელზე, კერძოდ:

ვეტერინარული პრეპარატებისა და სხვა დამაბინძურებლების ნარჩენი ნივთიერებების გამოსაკვლევად მიმდინარე წელს აღებული იქნება 300 ნიმუში
რძესა და რძის ნაწარმში ცხიმის სისუფთავის განსაზღვრისათვის - 300 ნიმუში
ბრუცელოზზე გამოსაკვლევად - 200 ნიმუში
ყველში სტაფილოკოკური ენტეროტოქსინის გამოსავლენად - 50 ნიმუში
ყველში კუაგულაზა დადებითი სტაფილოკოკუს აურეუსის კვლევისთვის - 50 ნიმუში
სასმელ რძეში აფლატოქსინ M1-ის კვლევისთვის - 100 ნიმუში
რძესა და რძის პროდუქტებში (მათ შორის, ბავშვთა კვება) ტყვიის შემცველობის განსასაზღვრისათვის - 20 ნიმუში
სალმონელასა და ლისტერიას გამოსავლენად - 165 ნიმუში
„აღსანიშნავია, რომ რძისა და რძის პროდუქტების ნიმუშების აღება მოხდეს სათანადო წესითა და სურსათის ეროვნული სააგენტოს ზედამხედველობით, რათა გამოირიცხოს საკვლევი ნედლეულის დაბინძურება.

სურსათის ეროვნული სააგენტო რძის მწარმოებელ კომპანიებს ინტენსიურად, წელიწადში საშუალოდ 10-ჯერ ამოწმებს. კონტროლი „ფერმიდან სუფრამდე“ პრინციპის დაცვით მოიცავს წარმოების სრულ ჯაჭვს, ასევე ლაბორატორიულ კვლევას სხვადასხვა მაჩვენებელზე.

გასულ, 2024 წელს სურსათის ეროვნულმა სააგენტომ 17 ათასი სახელმწიფო კონტროლი განახორციელა, დარღვევების მაჩვენებელმა 3,2% შეადგინა.

შემოწმების პარალელურად, სააგენტოს პრიორიტეტია გამჭვირვალობა, დარღვევის შესახებ საზოგადოების ინფორმირება. ამასთან, სურსათის ეროვნული სააგენტო ზედამხედველობას უწევს ბაზრიდან იმ სურსათის ამოღებას, სადაც გამოვლინდა დარღვევა; ასევე, უზრუნველყოფს მუდმივ მონიტორინგს იმისათვის, რომ ბაზარზე განთავსებული სურსათი იყოს სანდო, უსაფრთხო და უვნებელი“, - ნათქვამია სესის მიერ გავრცელებულ ინფორმაციაში.