ძიუდოისტების 4 ვერცხლი ევროპის ჩემპიონატზე

საფრანგეთის ქალაქ მონპელიეში დასრულდა ძიუდოისტთა ევროპის ჩემპიონატი, სადაც საქართველოს ნაკრების წარგზავნილებმა 4 ვერცხლის მედალი მოიპოვეს.

დასკვნით დღეს კაცებში სამ - 90, 100 და +100 კილოგრამ წონით კატეგორიაში გათამაშდა მედლების კომპლექტი და სამივე შემთხვევაში საქართველოს ნაკრები ფინალში იყო წარმოდგენილი.

-90 კგ კატეგორიაში პირველი წრიდან შეუდგა ასპარეზობას ოლიმპიური ჩემპიონი, მსოფლიო ჩემპიონატების ვერცხლის და ბრინჯაოს, ევროპის ჩემპიონატების ოქროს და ვერცხლის მედალოსანი ლაშა ბექაური. ტიტულიანმა ქართველმა ფინალისკენ მიმავალ გზაზე მოუგო აზერბაიჯანელ, შვედ, ფრანგ და ნიდერლანდელ მოწინააღმდეგეებს, მაგრამ ოქროს მედლისთვის შეხვედრაში, რომელიც რვა წუთზე მეტ ხანს გაგრძელდა, სერბი მეტოქის ნემანია მაიდოვის გამარჯვებით დასრულდა.

მსოფლიო ჩემპიონატის ბრინჯაოს პრიზიორი და ახალგაზრდული ოლიმპიური თამაშების ფინალისტი ილია სულამანიძე (100 კგ) შეჯიბრებაში მეორე წრიდან ჩაება. მოუგო გერმანელ, ავსტრიელ და ისრაელელ მოწინააღმდეგეებს, მაგრამ, სამწუხაროდ, იპონით დამარცხდა აზერბაიჯანელ ზელიმ კოცოევთან და კვარცხლბეკის მეორე საფეხურზე ავიდა.

მძიმე წონაში ოლიმპიური თამაშების ვერცხლის მედალოსანი, მსოფლიო ჩემპიონატების ოქროს და ბრინჯაოს, ასევე ევროპის ჩემპიონატების ორი ოქროს და სამი ბრინჯაოს მფლობელი და ევროპული თამაშების ჩემპიონი გურამ თუშიშვილი მონპელიეს ტატამზე ასპარეზობას მეორე წრიდან შეუდგა. დაამარცხა გერმანელი, თურქი და უნგრელი ძიუდოისტები. ფინელ მარტი პუუმალაინენთან გადამწყვეტ შეხვედრას თუშიშვილი ვაზარით იგებდა, მაგრამ ძირითადი დროის მიწურულს მეტოქემაც ვაზარი დაიმსახურა. საქმე ოქროს ქულამდე მივიდა, აქ კი გამარჯვება იპონით ფინელს დარჩა.

ერთი დღით ადრე, ასევე ვერცხლის მედლით დაასრულა გამოსვლა მსოფლიოს 2-გზის ჩემპიონმა ტატო გრიგალაშვილმა (- 81 კგ), ხოლო ოლიმპიური ჩემპიონი ლაშა შავდათუაშვილი(-73კგ) მესამე ადგილისთვის შეხვედრაში დამარცხდა კოსოვოელ მოწინააღმდეგესთან.