მარცხი და ქართველების დაუმსახურებელი კრიტიკა “კვარა”-ს მიმართ

“ნაპოლი”-ს ისტორიული სვლა ჩემპიონთა ლიგაზე ¼ ფინალში დასრულდა. კლუბმა ვერ შეძლო ჩემპიონთა ლიგის 7-გზის გამარჯვებულის მილანის “მილანი”-ს ბარიერის დაძლევა, განმეორებითი შეხვედრა ფრედ 1:1 დასრულდა, ორი მატჩის ჯამში 1:2 დამარცხდა და გამოეთიშა ასპარეზობას.

“ნაპოლი”-მ შეხვედრა აქტიურად დაიწყო, პირველი 20 წუთის განმავლობაში “მილანი” საკუთარ საჯარიმოს მიაჯაჭვა, მაგრამ რეალურ საგოლე მომენტამდე საქმე არ მისულა. 22- წუთზე პირველივე სახიფათო შეტევისას მარიო რუიმ რაფაელ ლეაო საჯარიმოში წააქცია და პოლონელმა არბიტრმა მარცინიაკმა “მილანი”-ს სასარგებლოდ პენალტი უყოყმანოდ დანიშნა, თუმცა ალექს მერეტმა შეძლო “ნაპოლი”-ს გადარჩენა და ოლივიე ჟირუს დარტყმული ბრწყინვალე ნახტომში მოიგერია.

“ნაპოლი” აგრძელებდა შეტევებს, მაგრამ საგოლე მომენტები კვლავ მის კართან იქმნებოდა. 28-ე წუთზე მერეტმა კვლავ აჯობა ჟირუს, მაგრამ 43-ე წუთზე ნდომბელემ მეტოქის საჯარიმოსთან ბურთი დაკარგა, ლეაომ მთელი მოედანი ისე გაირბინა, მისი შეჩერება ვერავინ შეძლო და საგოლედ უპასა ოლივიე ჟირუს, რომელსაც მესამე მცდელობით უკვე აღარ გასჭირვებია “ნაპოლი”-ს კარის დალაშქვრა.

მეორე ტაიმი კვლავ მასპინძლების შეტევით დაიწყო, ორჯერ ჰქონდა კარგი შანსი ხვიჩა კვარაცხელიას თავისივე ბრწყინვალე დრიბლინგებით ანგარიშის გათანაბრების, მაგრამ სამწუხაროდ ორივეჯერ ბურთი კარს ასცდა. 81-ე წუთზე ფიკაიო ტომორიმ საჯარიმოში ხელით ითამაშა და მარცინიაკმა კიდევ ერთი პენალტი დანიშნა, მაგრამ კვარაცხელიას დარტყმული მენიომ კუთხურზე მოიგერია. მსაჯის მიერ დამატებულ მე-3 წუთზე ვიქტორ ოსიმენმა რასპადორის გადაცემით ანგარიში გაათანაბრა, მაგრამ უკვე გვიანი იყო, “ ნაპოლი” ორი მატჩის ჯამში 1:2 დამარცხდა და ჩემპიონთა ლიგას დაემშვიდობა.

გავლენიანმა გამოცემებმა და სპეციალისტებმა “ნაპოლი”-ს რიგებში საუკეთესო შეფასება ხვიჩა კვარაცხელიას მისცეს, მიუხედავად გაცუდებული თერთმეტმეტრიანისა, ის ერთადერთი იყო, რომელიც ბოლომდე არ დანებდა და ხშირად მარტო ცდილობდა “მილანი”-ს ორგანიზებული დაცვის გარღვევას. მატჩის განმავლობაში მას 10 წარმატებული დრიბლინგი და 6 მნიშვნელოვანი პასი ჰქონდა, რაც ერთ-ერთი საუკეთესო მაჩვენებელია ჩემპიონთა ლიგის მიმდინარე გათამაშებაში. შეხვედრის დასრულების შემდეგაც, ყველაზე მეტად ხვიჩა განიცდიდა მომხდარ ფაქტს და მეტოქის თუ საკუთარი გუნდის ფეხბურთელები სათითაოდ მიდიოდნენ და ამხნევებდნენ.

აქვე აღსანიშნავია ქართველი გულშემატკივრების დაუმსახურებელი კრიტიკა ხვიჩას მიმართ, ადამიანებმა, რომელთა უმრავლესობამ “ნაპოლი”-ს და ალბათ ფეხბურთის შესახებაც კი კვარაცხელიას დამსახურებით გაიგეს, ერთი თერთმეტმეტრინის გაფუჭების შემდეგ, რომელიც ფეხბურთში ჩვეულებრივი ამბავია, სოციალური ქსელებში სრულიად გაუაზრებელი კრიტიკის ქარცეცხლი დაატახეს ქართველ ვარსკვლავს.

მატჩის შემდეგ, ხვიჩა კვარაცხელიამ სოციალურ ქსელში დაწერა: “რთულია, როცა ვხედავ ცრემლებს თქვენს თვალებზე და თქვენთვის ბედნიერება ვერ მომაქვს. ყველანაირად ვეცდები დღევანდელი დღე გამოცდილებად მივიღო. ბოდიში და მადლობა იმ მხარდაჭერისთვის, რომელსაც ყოველ წამს ვგრძნობ! მიყვარხართ და დავბრუნდებით უფრო ძლიერები. წინ ბევრი მატჩია და ოცნება გრძელდება! #FORZANAPOLISEMPRE”.

“ნაპოლი”-“მილანი” 1:1

გოლები: ოსიმენი (93წ)- ჟირუ (43წ)

გამოუყენებელი პენალტი: კვარაცხელია(81წ)-ჟირუ (22წ)

შემადგენლობები:

“ნაპოლი”-მერეტი, დი ლორენცო, რაჰმანი(74. ოსტიგორი), ჟოან ჟეზუში, მარიო რუი(34. ოლივერა), ლობოტკა, ნდომბელე(63. ელმასი), ჟელინსკი(74. რასპადორი), პოლიტანო(34. ლოსანო), კვარაცხელია, ოსიმენი.

“მილანი”-მენიო, კალაბრია, კიაერი ტომორი, ტეო ერნანდესი, კრუნიჩი, ტონალი, ბრაიმ დიასი(59. მესიასი), ბენასერი, ლეაო(84. სალემაკერსი), ჟირუ(68. ორიჯი)

აგრეთვე დაგაინტერესებთ:

📌 ხვიჩა კვარაცხელია: „ბოდიში და მადლობა იმ მხარდაჭერისთვის რომელსაც ყოველ წამს ვგრძნობ! მიყვარხართ და დავბრუნდებით უფრო ძლიერები“

📌 ელენე ქებაძე ევროპის ბრინჯაოს პრიზიორია

📌 გივი მაჭარაშვილი ევროპის ჩემპიონია!