საქართველოს ხელბურთელთა ნაკრები ევროპის ჩემპიონატზე ითამაშებს!

პირველად, დამოუკიდებელი ქართული ხელბურთის ისტორიაში საქართველოს ნაკრები ევროპის ჩემპიონატზე იასპარეზებს.

წინა ტურში შვეიცარიასთან განცდილი მარცხის მიუხედავად, ჩვენი ეროვნული გუნდი ინარჩუნებდა შანსს კონტინენტის პირველობაზე მოსახვედრად და ეს შანსი ბრწყინვალედ გამოიყენა, სტუმრად დაამარცხა რა პირველ ადგილოსანი და აქამდე წაუგებელი უნგრეთის ნაკრები დრამატულ ბრძოლაში 31:30.

შეხვედრის პირველი ტაიმი საქართველოს ნაკრების გამარჯვებით 17:14 დასრულდა, მეორე ნახევარში მასპინძლებმა შეძლეს გარდატეხის შეტანა თამაშში და მატჩის დასრულებამდე რამდენი წუთით ადრე 30:28 დაწინაურდნენ, აქ კი ჩვენმა ხელბურთელებმა გამოავლინეს საოცარი ბრძოლისუნარიანობა, გაათანაბრეს თამაში და ბოლო წამებზე ცხოვრებაძის გატანილი 7 მეტრიანით გაიმარჯვეს 31:30.

საქართველოს ნაკრების სრული შემადგენლობა დღევანდელ მატჩში ასეთი იყო:

გიორგი ლაპიაშვილი, ხაზეინ რუსტამოვი, ირაკლი კბილაშვილი, გიორგი ცხოვრებაძე, ერეკლე არსენიშვილი, სანდრო დარსანია, ზურაბ გოგავა, ნიკოლოზ კალანდაძე, ზურაბ აბრამიშვილი, მირიან გავაშელიშვილი, გიორგი დიხამინჯია, დავით ნიქაბაძე, ზურაბ სიმონია.

ოფიციალური პირები: ტიტე კალანდაძე, შოთა თევზაძე, მერაბ მეტრეველი, ლევან კაკუშაძე.

ევრო 2024-ზე სულ 24 ნაკრები მიიღებს მონაწილეობას: ავსტრია, ბოსნია და ჰერცოგოვინა, ხორვატია, ჩეხეთი, დანია, ფარერების კუნძულები, საფრანგეთი, საქართველო, გერმანია, საბერძნეთი, უნგრეთი, ისლანდია, მონტენეგრო, ნიდერლანდები, ჩრდილოეთ მაკედონია, ნორვეგია, პოლონეთი, პორტუგალია, რუმინეთი, სერბეთი, სლოვენია, ესპანეთი, შვეიცარია, შვედეთი.