რუსეთ-უკრაინის ომს პირველი ჟურნალისტი ემსხვერპლა

რუსეთის არმიის უკრაინაში შეჭრის გაშუქებას, მედიის პირველი წარმომადგენელი, ადგილობრივი ოპერატორი ემსხვერპლა.

როგორც უკრაინულ ტელეგრამ არხზე გავრცელებულ ინფორმაციაშია ნათქვამი, ოკუპანტების თავდასხმას KievLive-ის ოპერატორის - ევგენი საკუნის სიცოცხლე ემსხვერპლა.

იგი, კიევის ტელეანძაზე გუშინდელი თავდასხმის შედეგად დაღუპული 5 პირიდან ერთ-ერთია, ხოლო დანარჩენი 4 დაღუპული პირის ვინაობის დადგენა ამ დრომდე ვერ მოხერხდა.

ორგანიზაცია „რეპორტიორები საზღვრებს გარეშე“ იტყობინება, რომ უკრაინაში ომის გაშუქებისას 2 დანიელი ჟურნალისტი დაჭრეს:

გავრცელებული ინფორმაციით 26 თებერვალს, უკრაინის ქალაქ ოხტირკაში დანიური ტაბლოიდის, Ekstra-Bladet-ის რეპორტიორი სტეფან ვაიკერტი და ფოტოგრაფი ემილ ფილტენბორგ მიკკელსენი დაბომბილი საბავშვო ბაღის გადასაღებად ავტომობილით გადაადგილდებოდნენ, როდესაც ჟურნალისტების ავტომობილს ცეცხლი გაუხსნეს, მიუხედავად იმისა, რომ ტყვიაგაუმტარი ჟილეტები ეცვათ, ორივე მათგანმა სერიოზული ჭრილობები მიიღო. ამჟამად მათ სიცოცხლეს საფრთხე არ ემუქრება.

ორგანიზაციის ცნობით, 2014-2016 წლებში დონბასის რეგიონში საბრძოლო მოქმედებების დროს ათი ჟურნალისტი დაიღუპა.

RSF-ის 2021 წლის მსოფლიო პრესის თავისუფლების ინდექსში უკრაინა 180-ც ქვეყანას შორის 97-ე, რუსეთი კი 150-ე ადგილს იკავებს.