ბელგიაში სექსმუშაკებმა დეკრეტში გასვლის და პენსიის უფლება მიიღეს

ბელგია - მსოფლიოში პირველი ქვეყანაა, სადაც სექსმუშაკებთან ოფიციალური შრომითი ხელშეკრულებები გაფორმდება, ისინი მიიღებენ სამედიცინო დაზღვევას, პენსიას, ასევე დეკრეტულ შვებულებაში და ბიულეტენზე გასვლის უფლება ექნებათ. ინფორმაციას BBC ავრცელებს.

ახალი კანონის მიღების შემდეგ, ფაქტობრივად, სექსმუშაკების მიმართ დამოკიდებულება ისეთივე იქნება, რვგორც ნებისმიერი სხვა პროფესიის წარმომადგენლის მიმართ.

„მე მაშინაც კი მიწევდა მუშაობა, როდესაც ორსულობის მეცხრე თვეზე ვიყავი. კლიენტებთან სექსი მშობიარობამდე ერთი კვირით ადრე მქონდა“, - ამბობს სექსმუშაკი სახელად სოფი.

სოფი ამბობს, რომ ხუთი შვილი ჰყავს და, შესაბამისად, ფული ძალიან სჭირდება.

როდესაც მეხუთე შვილს აჩენდა, საკეისრო კვეთა დასჭირდა და ექიმებმა უთხრეს, რომ 6 კვირის განმავლობაში წოლითი რეჟიმი ესაჭიროება. მაგრამ სოფისთვის ეს შეუძლებელი იყო და მალევე სამუშაოს დაუბრუნდა.

„შვებულებას ვერ ავიღებდი, ფული ძალიან მჭირდებოდა“, - ამბობს სექსმუშაკი.

მისი თქმით, ახალი წესების შემოღების შემდეგ შეძლებს ცხოვრებას, როგორ „სხვა ნორმალური ადამიანები.“

ახალი კანონის მიხედვით, სუტენიორები, რომლებიც სექსის ბიზნესს აკონტროლებენ, ლეგალურად მუშაობას შეძლებენ, მაგრამ მათ საკმაოდ მკაცრი წესები უნდა დაიცვან. მძიმე დანაშაულებისთვის გასამართლებულ პირებს სექსმუშაკების სამსახურში აყვანა ეკრძალებათ.

მსოფლიოში ათობით მილიონი სექს-მუშაკი არსებობს, ბელგიაში სექს-სამუშაო 2022 წელს დეკრიმინალიზებული იყო. ის სრულიად ლეგალურია გერმანიაში, საბერძნეთში, ნიდერლანდებში და თურქეთში. მაგრამ შრომის ხელშეკრულების და უფლებების შემოღება, რაც ბელგიაში დაანონსდა, მსოფლიოში პირველად ხდება.