დანიის პრემიერი ტრამპს გრენლანდიის შესახებ ესაუბრება

დანიის პრემიერ-მინისტრ მეტე ფრედერიქსენსა და აშშ-ის არჩეულ პრეზიდენტ დონალდ ტრამპს შორის სატელეფონო საუბარი გაიმართა. ინფორმაციას დანიის პრემიერის ოფისი ავრცელებს.

განცხადებაში აღნიშნულია, რომ საუბარი შეეხო ორმხრივ ურთიერთობებსა და გრენლანდიის სტატუსს.

„საუბრისას პრემიერ-მინისტრმა ხაზი გაუსვა გრენლანდიის პრემიერ-მინისტრის მუტე ეგედეს განცხადებას, რომ გრენლანდია არ იყიდება და აღნიშნა, რომ დამოუკიდებლობის შესახებ გადაწყვეტილება თავად გრენლანდიამ უნდა მიიღოს“, – ნათქვამია განცხადებაში.

დანიის მთავრობის მეთაურმა ასევე ხაზგასმით აღნიშნა, რომ მისი ქვეყანა მზად არის, არქტიკის უსაფრთხოებაზე  მეტი პასუხისმგებლობა აიღოს და რომ „დანიის კომპანიები ხელს უწყობენ ეკონომიკურ ზრდას და სამუშაო ადგილების შექმნას აშშ-ში“.

„საუბრისას ასევე განიხილეს უკრაინაში მიმდინარე ომი, ახლო აღმოსავლეთში არსებული ვითარება და ჩინეთთან ურთიერთობები“, - აღნიშნულია დანიის პრემიერ-მინისტრის ოფისის განცხადებაში.

ინფორმაციისთვის, დონალდ ტრამპმა მარ-ა-ლაგოში ჟურნალისტებთან საუბრისას განაცხადა, რომ პანამის არხსა და გრენლანდიაზე კონტროლის მოსაპოვებლად სამხედრო ძალის გამოყენებას არ გამორიცხავს.