გერმანიის ულტრამემარჯვენე ლიდერი: ჩვენ გვინდა ძალიან კარგი ურთიერთობა რუსეთთან

პარტია ალტერნატივა გერმანიისთვის (AfD) ლიდერმა ალის ვაიდელმა განაცხადა, რომ მისი პარტია მიზნად ისახავს „ძალიან კარგი ურთიერთობების დამყარებას“ დიდ ქვეყნებთან, მათ შორის რუსეთთან, - ამის შესახებ მან გამოცემა Bild-თან ისაუბრა.

ჟურნალისტის კითხვაზე, თუ რატომ ცდილობს ალტერნატივა გერმანიისთვის რუსეთთან თანამშრომლობის დამყარებას იმ დროს, როცა გერმანიას სამხედრო ქმედებებით ემუქრება, ალის ვაიდელმა უპასუხა: „ჩვენ გვინდა ძალიან კარგი ურთიერთობა გვქონდეს ჩვენს ევროპელ მეზობლებთან. მაგრამ, ასევე, გვინდა ძალიან კარგი ურთიერთობა გვქონდეს დიდ სახელმწიფოებთან. ეს, ასევე, ეხება რუსეთს... ჩვენ გვინდა დავასრულოთ სანქციების პოლიტიკა, რომელიც პირველ რიგში აზიანებს ჩვენს ქვეყანას. ჩვენ ყველაზე მაღალი ელექტროენერგიის ფასები გვაქვს. უკვე კონკურენტუნარიანები აღარ ვართ“.

ჟურნალისტმა ვაიდელს, ასევე, ჰკითხა, თუ რატომ არ აღიარებს იგი იმ ფაქტს, რომ რუსეთი გერმანიას ომით ემუქრება.

„ჩვენ კარგი ურთიერთობები გვინდა. რას აკეთებდა გერმანიის ფედერალური მთავრობა ბოლო 3 წლის მანძილზე რუსეთის წინააღმდეგ? ჩვენ ესკალაციის სპირალში გავეხვიეთ. რუსეთის წინააღმდეგ იყო ვერბალური, ფინანსური და ასევე, შეიარაღებული თავდასხმებიც კი. გერმანული ტანკები კვლავ რუსეთის წინააღმდეგ იქნა გამოყენებული მეორე მსოფლიო ომის შემდეგ. ისტორია სრულად არის დავიწყებული, მე თუ მკითხავთ“, - აღნიშნა მან.

როდესაც ჰკითხეს, რომ მას არც ერთი კრიტიკული სიტყვა არ უთქვამს რუსეთის შესახებ, ვეიდელმა უპასუხა: „დონალდ ტრამპმაც ეს არ გააკეთა

„თქვენ უნდა დასხდეთ მოლაპარაკებების მაგიდასთან. თქვენ უნდა ესაუბროთ ერთმანეთს. ჩვენ, როგორც AfD-ს არაფერი გვითქვამს, გარდა იმისა, რომ სამშვიდობო მოლაპარაკებებში უნდა შევიდეთ. უპირველეს ყოვლისა, ჩვენ უნდა დავასრულოთ სანქციების პოლიტიკა“, - დასძინა AfD-ის ლიდერმა.