კვიპროსი ნატოში გაწევრიანების გეგმაზე მუშაობს - ბერძნული მედია

 კვიპროსი ჩრდილოატლანტიკურ ალიანსში გაწევრიანების გეგმაზე მუშაობს. ინფორმაციას ბერძნული გამოცემა Kathimerini ავრცელებს.

ამ ინფორმაციის მიხედვით, ეს საკითხი ვაშინგტონში კვიპროსის პრეზიდენტის, ნიკოს ხრისტოდულიდისის ვიზიტის დროს განიხილებოდა. კვიპროსის ლიდერი აშშ-ში შეერთებული შტატების პრეზიდენტს, ჯო ბაიდენს შეხვდა.

„ნიქოზიამ შეადგინა გეგმა, რომლის საბოლოო მიზანი ნატოში კვიპროსის გაწევრიანებაა. კვიპროსის ხელისუფლებას ესმის, თუ რა სერიოზულ დაბრკოლებებს შეხვდება ამ გზაზე“, - წერს Kathimerini.

ჩრდილოატლანტიკურ ალიანსში კვიპროსის გასაწევრიანებლად ამ ქვეყნის და ნატოს „ეტაპობრივი დაახლოება“ მოხდება.

ამავე წყაროს ცნობით, აშშ-ის თეთრი სახლის მრჩეველმა ეროვნული უშიშროების საკითხებში ჯეიკ სალივანმა ამ გეგმას „წაუგებელი ვარიანტი“ უწოდა. მისი თქმით, მოვლენათა ამ სცენარით განვითარება „სერიოზულ პერსპექტივებს“ ქმნის.

ერთ-ერთი ქვეყანა, რომელმაც ნატოში კვიპროსის გაწევრიანებას შეიძლება ხელი შეუშალოს, თურქეთია, რომელიც მრავალი წლის განმავლობაში კვიპროსს დამოუკიდებელ ქვეყნად არ აღიარებს.

ცნობისთვის, 2023 წლის აპრილში ნატოს წევრი ფინეთი გახდა, ხოლო 2024 წლის მარტში ალიანსს შვედეთიც შეუერთდა.