რუსეთში იერიში მიიტანეს ნავთობის საცავზე, რომელიც სამხედრო აეროდრომს საწვავით ამარაგებდა

რუსეთში, კერძოდ სარატოვის ოლქში, 8 იანვარს იერიში მიიტანეს ნავთობის საცავზე, რომელიც საწვავით ამარაგებდა სამხედრო აეროდრომს „ენგელსი -2“. ამის შესახებ დღეს გავრცელებულ ინფორმაციას უკრაინის შეიარაღებული ძალების გენერალური შტაბი ადასტურებს.

როგორც გენშტაბში აცხადებენ, სამიზნე ტერიტორიაზე არაერთი აფეთქება მოხდა, რამაც ფართომასშტაბიანი ხანძარი გამოიწვია.

„დღეს ღამით, იერიში განხორციელდა სარატოვის ოლქის ქალაქ ენგელსში არსებულ ნავთობპროდუქტების შესანახ ბაზა „კრისტალზე“. უნდა აღინიშნოს, რომ ეს ნავთობის საცავი საწვავით ამარაგებდა აეროდრომს „ენგელსი-2“, სადაც მტრის სტრატეგიული ავიაციაა ბაზირებული.

ნავთობის საწყობების აფეთქება სერიოზულ ლოგისტიკურ პრობლემებს უქმნის რუსი ოკუპანტების სტრატეგიულ ავიაციას და არსებითად ამცირებს მათ შესაძლებლობებს, დარტმები განახორციელონ უკრაინის ქალაქებსა და სამოქალაქო ობიექტებზე“, - ნათქვამია ინფორმაციაში.

როგორც უკრაინის გენშტაბში აცხადებენ, დავალება უკრაინის თავდაცვის სამინისტროს მთავარი სადაზვერვო სამმართველოსა და უკრაინის შეიარაღებული ძალების უპილოტო სისტემების ძალებმა შეასრულეს თავდაცვის ძალების სხვა სტრუქტურებთან თანამშრომლობით.

ადგილობრივმა ხელისუფლებამ ინფორმაცია გაავრცელა „სამრეწველო ობიექტის“ დაზიანების შესახებ.