ზელენსკი: რუსეთზე მეტი ზეწოლა უნდა განხორციელდეს, თუ ის სრულ და უპირობო ცეცხლის შეწყვეტას არ დათანხმდება

უკრაინა მოელის, რომ რუსეთის წინააღმდეგ ევროკავშირის სანქციების მე-17 პაკეტი გავლენას მოახდენს ყველაფერზე, რაც რუსეთის სამხედრო მანქანას აფინანსებს: ბანკებს, ნავთობს, ენერგეტიკას, მეტალურგიას და „ჩრდილოვან ფლოტს“. ამის შესახებ უკრაინის პრეზიდენტი ვოლოდიმირ ზელენსკი Telegram-ზე წერს.

ზელენსკიმ განაცხადა, რომ დღეს მან შეხვედრა გამართა ევროპის საბჭოს პრეზიდენტ ანტონიო კოშტასთან და ევროკომისიის პრეზიდენტ ურსულა ფონ დერ ლაიენთან.

„ვისაუბრე სტამბოლში დღევანდელი მოლაპარაკებების შესახებ. რუსეთზე მეტი ზეწოლა უნდა განხორციელდეს, თუ ის სრულ და უპირობო ცეცხლის შეწყვეტას არ დათანხმდება. ამიტომ, მადლიერი ვარ სანქციების მე-17 პაკეტის მომზადებისთვის. ჩვენ ველით, რომ ეს შეეხება ყველაფერს, რაც აფინანსებს რუსეთის სამხედრო მანქანას: ბანკებს, ნავთობს, ენერგეტიკას, მეტალურგიას და „ჩრდილოვან ფლოტს“, - აღნიშნა პრეზიდენტმა.

ამასთან, ზელენსკის თქმით, მოლაპარაკებების დროს განსაკუთრებული ყურადღება დაეთმო უკრაინის ევროკავშირისკენ სვლას - მოლაპარაკებების კლასტერებისა და სავაჭრო თანამშრომლობის რაც შეიძლება მალე გახსნის შესაძლებლობას.

„მადლობას გიხდით უკრაინის მხარდაჭერისა და ღირსეული მშვიდობის დამყარების ხელშეწყობისთვის“, - ხაზგასმით აღნიშნა ზელენსკიმ.