26 მაისი - საქართველო დამოუკიდებლობის დღეს აღნიშნავს

26 მაისი საქართველოს დამოუკიდებლობის დღეა. 2022 წელს, დამოუკიდებლობის დღის სლოგანია: „ევროპისკენ“.

თბილისში, თავისუფლების მოედანზე საქართველოს ეროვნული ჰიმნის გარდა, წელს პირველად შესრულდება ევროკავშირის ჰიმნიც.

დღეს, ყველაზე დიდ ეროვნულ დღესასწაულს საზეიმოდ აღნიშნავენ თბილისსა და საქართველოს კიდევ 15 ქალაქში, სადაც კონცერტების და გამოფენების გარდა, წარმოდგენილი იქნება საქართველოს შეიარაღებული ძალების სამხედრო ტექნიკა.

26 მაისს, ტრადიციულად, ფიცს დადებენ წვევამდელები. ეს ცერემონია 12:00 საათზე ერთდროულად დაიწყება თბილისის თავისუფლების მოედანზე, ფოთში, დმანისში, ხევსურეთის გუდანის ჯვართან და ოზურგეთის მუნიციპალიტეტის სოფელ შემოქმედში.

თბილისში, თავისუფლების მოედანზე, რეკრუტებთან ერთად მსვლელობით ჩაივლიან საქართველოს თავდაცვის ძალების დანაყოფები და სტრატეგიული პარტნიორი ქვეყნების არმიის წარმომადგენლები.

1918 წლის 26 მაისს, საქართველოს ეროვნულმა საბჭომ ნოე ჟორდანიას ხელმძღვანელობით, დამოუკიდებლობის აქტი მიიღო თბილისში, გოლოვინის პროსპექტზე, დღევანდელ რუსთაველის გამზირზე მდებარე კავკასიის მეფისნაცვლის ყოფილ რეზიდენციაში, სადაც დღეს მოსწავლე ახალგაზრდობის სასახლეა.

რუსეთისგან დამოუკიდებელმა საქართველოს პირველმა რესპუბლიკამ არსებობა 1921 წლის თებერვალში შეწყვიტა, საბჭოთა რუსეთის სამხედრო აგრესიის და ოკუპაციის შედეგად. საქართველომ დამოუკიდებლობა 1991 წლის 9 აპრილს აღიდგინა.

ასევე დაგაინტერესებთ:

🔵 პოლონეთში მცხოვრებმა ქართველმა კაცმა ცოლი მოკლა - „კურიერი“

🔵  გამყრელიძე: მალე „მაიმუნის ყვავილის“ ვირუსის სპეციალური პისიარ ტესტი გვექნება

🔵 „საოცარი ადამიანი იყო, ყველას პატრონობდა“ - პოლონეთში ავარიას აფხაზეთიდან დევნილი 27 წლის ლაშა კალანდია ემსხვერპლა