გადაკვეთა თუ არა რუსეთის საჰაერო ძალების თვითმფრინავმა საქართველოს საჰაერო სივრცე - ეკონომიკის სამინისტროს განმარტება

ეკონომიკის სამინისტრო რუსული სამხედრო ძალების მიერ საქართველოს საჰაერო სივრცის გამოყენების შესახებ  გავრცელებულ ინფორმაციაზე განცხადებას ავრცელებს.

სამინისტროს ცნობით, საქართველოს საჰაერო სივრცე რუსეთის საჰაერო ძალების თვითმფრინავს არ გადაუკვეთია. 

"განვმარტავთ, რომ საქართველოს საჰაერო სივრცე რუსეთის საჰაერო ძალების თვითმფრინავს არ გადაუკვეთია - საქართველოს ცა გამოიყენა რუსეთის საგანგებო სიტუაციების მართვის სამინისტროს კუთვნილებაში არსებულმა საჰაერო ხომალდმა Il-76, სარეგისტრაციო ნომრით RA76429.

აღნიშნული რეისი იყო ჩვეულებრივი სამოქალაქო დანიშნულების ფრენა, რომელსაც არ ესაჭიროება საქართველოს მხრიდან რაიმე დამატებითი ნებართვა", - აღნიშნულია სამინისტროს განცხადებაში.

აღსანიშნავია, რომ მანამდე, საქართველოში უკრაინის დროებითმა რწმუნებულმა ანდრეი კასიანოვმა განაცხადა, რომ რუსეთს უკრაინაში საბრძოლველად დამატებითი ჯარები საქართველოს ოკუპირებული ტერიტორიებიდან სახმელეთო, კომბინირებული გზით გაჰყავს.

"მიუხედავად იმისა, რომ რუსეთი იჩენს მზადყოფნას მოლაპარაკებებისთვის, ახლა ვიღებთ დასტურს, რომ მტერი აგზავნის დამატებით ჯარებს სხვადასხვა ქალაქიდან.

მათ შორის სომხეთიდან, საქართველოს ოკუპირებული ტერიტორიებიდან: აფხაზეთიდან და ცხინვალიდან.

ეს არის პასუხი თქვენს შეკითხვებზე.

უკრაინის თავდაცვის სამინისტროს ცნობით, ჯარისკაცების გადაყვანა სახმელეთო კომბინირებული გზით ხორციელდება.

საქართველოს საჰაერო სივრცის აგრესორი ქვეყნის ინტერესებისთვის გამოყენება ჯერ არ დაფიქსირებულა", - განაცხადა ანდრეი კასიანოვმა.

სხვა სიახლეები:

📍ყოველ წუთს შენი ხმის გაგონება მინდა: „ალექს გაწმინდე ავტომატი?“ - რას წერს უკრაინელი ჟურნალისტი, რომელიც ბოლო წუთამდე ქართველ მებრძოლებთან იყო

📍საბერძნეთი მარიუპოლის სამშობიარო სახლს აღადგენს“ - პრემიერ-მინისტრის განცხადება