კახეთის გუბერნატორი ავარიაში მოჰყვა - ირაკლი შიოშვილი კლინიკაშია გადაყვანილი

კახეთის გუბერნატორმა ავტოსაგზაო შემთხვევის შედეგად სხეულის დაზიანება მიიღო. ამჟამად მკურნალობას დედაქალაქში გადის.

თბილისიდან კახეთის მიმართულებით მიმავალი ირაკლი შიოშვილი, გურჯაანის შემოვლით გზაზე, სატვირთო ავტომანქანას შეეჯახა.

შემთხვევის შედეგად, სახელმწიფო რწმუნებულმა დაზიანებები მიიღო და ის თბილისის ერთ - ერთ კლინიკაშია გადაყვანილი.

ექიმების განმარტებით, პაციენტზე ამჟამად დაკვირვება მიმდინარეობს, რის შემდეგაც მას, შესაძლოა, ქირურგიული ჩარევა დასჭირდეს.

ე.წ ტრაილერში მყოფი მგზავრებიდან, არავინ დაზიანებულა. საგზაო შემთხვევის მიზეზებთან დაკავშირებით რამდენიმე მოსაზრება გავრცელდა, რაზედაც თავად შიოშვილმა განაცხადა:

„ვმოძრაობდი ბაკურციხე-გურჯაანის შემოვლით გზაზე, თელავის მიმართულებით. სიღნაღში ვიყავი საქმეზე და უკან ვბრუნდებოდი. ეს ამბავი არანაირ კავშირში არ არის იმ ღონისძიებასთან. 

საჭესთან მე ვიჯექი და მსუბუქი დაზიანებები მივიღე. სხვა არავინ დაშავებულა. რაც შეეხება გავრცელებულ ინფორმაციას ნასვამობის შესახებ, ეს არის საფუძველს მოკლებული და კიდევ ერთი ტყუილი. იცით, რომ პოსტკოვიდურ პერიოდს გავდივარ და მკურნალობას ვაგრძელებ გართულებებზე. აქედან გამომდინარე, ნასვამი ვერანაირად ვერ ვიქნებოდი”, – აღნიშნა კახეთის გუბერნატორმა ირაკლი შიოშვილმა.

გამოძიება მომხდარ ფაქტზე, სისხლის სამართლის კოდექსის 276-ე მუხლით მიმდინარეობს.

შემთხვევა კვირას, 12 დეკემბერს, საღამოს მოხდა. 

წყარო: knews.ge

ფოტოზე: სახელმწიფო რწმუნებულის ავტომანქანა ავარიის შემდეგ. ჟურნალისტ კახა კუპატაძის ფოტო.

დღის სხვა მთავარი ამბები:

🔵 საზარელი შემთხვევა - კაცმა ცოლი და სიდედრი მოკლა, შემდეგ თავი მოიკლა

🔵 მძღოლი შეუძლოდ გახდა, საჭე ვერ დაიმორჩილა და აფთიაქში შევარდა - იგი საავადმყოფოშია გადაყვანილი (ფოტო)