ლევან მაჭავარიანი გამჭვირვალობის კანონზე: ამბობდნენ, რომ თუ ამ კანონს მივიღებდით, ავკრძალავდით ოპოზიციურ ტელე არხებს, ენჯეო სექტორს, გავიდა ერთ წელზე მეტი, საზოგადოებამ ნახა, რომ ეს აბსოლუტურად ტყუილი იყო

რას ამბობდნენ ისინი [ოპონენტები] - რომ თუ ჩვენ ამ კანონს მივიღებდით, ავკრძალავდით ოპოზიციურ ტელე არხებს, ენჯეო სექტორს და თურმე, როგორ შეიძლებოდა, რომ ეჭვქვეშ დაგვეყენებინა დასავლელი დონორების მიერ გადმორიცხული ფული, - განაცხადა გადაცემაში „იმედის კვირა“ ფრაქცია „ქართული ოცნების“ თავმჯდომარის მოადგილემ, ლევან მაჭავარიანმა გამჭვირვალობის კანონზე საუბრისას.

„გავიდა ერთ წელზე მეტი, საზოგადოებამ ნახა, რომ ეს აბსოლუტურად ტყუილი იყო და იმაშიც დარწმუნდა, რომ EED -სთან და USAID -თან დაკავშირებით რა განცხადებებსაც ვაკეთებდით, ეს ყველაფერი სიმართლე იყო, რადგან აშშ-ის ადმინისტრაციამ ფაქტებსა და მტკიცებულებებზე დაყრდნობით ამხილა ეს ორგანიზაციები, როგორც კრიმინალური ორგანიზაციები“, - აღნიშნა ლევან მაჭავარიანმა

ფრაქცია „ქართული ოცნების“ თავმჯდომარის მოადგილემ ასევე, ისაუბრა მიხეილ სააკაშვილის საქართველოში ფარულად შემოსვლის მიზანსა და დასავლეთიდან მისი გათავისუფლების მოთხოვნაზე.

„ესეც გაღიზიანებას იწვევს ჩვენს საზოგადოებაში. ჩვენი მოქალაქეების აბსოლუტურმა უმრავლესობამ იცის, როგორი კრიმინალია მიხეილ სააკაშვილი. როდესაც ყოველ რეზოლუციაში გვიწერენ, რომ სააკაშვილი არის პოლიტპატიმარი და უნდა გავათავისუფლოთ, ამით რეპუტაციული კუთხით ჰარაკირის იტარებენ ის ევრობიუროკრატები, რომლებიც ამ კურსს არ უხვევენ, რადგან ისინი არ იცნობენ ქართველ ხალხს და წარმოდგენა არ აქვთ ჩვენი მოქალაქეების ხასიათთან დაკავშირებით“, - აღნიშნა ლევან მაჭავარიანმა.