ლევან მაჭავარიანი სანქციებთან დაკავშირებით ოპოზიციის მადლობაზე: „ხავსს ეჭიდებიან, ბატონი როთის იმედზე არიან დარჩენილები“

„ხავსს ეჭიდებიან, როთის იმედზე არიან დარჩენილები და ასეთი საკითხები ოპოზიციას უხარია“, - ამის შესახებ ფრაქცია „ქართული ოცნების“ თავმჯდომარის მოადგილემ ლევან მაჭავარიანმა გერმანიის მთავრობის მიერ დაწესებულ სანქციებზე საუბრისას განაცხადა, რის გამოც, ოპოზიციონერებმა გერმანიის მთავრობას მადლობა გადაუხადეს.

მისი თქმით, ოპოზიცია მძიმე მდგომარეობაშია.

„ოპოზიციას უხარია ასეთი საკითხები. მათი დღის წესრიგი მთლიანად ემსახურება, რომ რაღაც ქაოსი შემოიტანონ ჩვენ ქვეყანაში. იმ 4-ვე რადიკალურმა პარტიამ, კოლექტიურმა „ნაციონალურმა მოძრაობამ“ გააგზავნა ე.წ დანოსი ბრიუსელში, ეს არავის არ დაავიწყდეს, სადაც 4-ვე პარტია ხელს აწერდა და ფაქტობრივად ეხვეწებოდა ევროკავშირს, დაესანქცირებინა საქართველო, ყველანაირი ურთიერთობა გაეწყვიტათ ჩვენს ქვეყანასთან. ამის ფონზე, როდესაც დიდი ზარ-ზეიმით ასეთი წერილი აქვთ გაგზავნილ, იმის მერე, რა თქმა უნდა, არ უნდა გაგვიკვირდეს, ასეთი ნებისმიერი თემა მათ უხარიათ.

მაგრამ, ეს კიდევ ერთხელ მიუთითებს, თუ რა მძიმე მდგომარეობაში იმყოფებიან ისინი და როგორ ეჭიდებიან რაღაცა ხავსს, სანქციას, იქ ჩამოჰყავთ ყოფილი საგარეო საქმეთა მინისტრები, ბატონი როთის იმედზე არიან დარჩენილები და ეს არის მათი სავალალო მდგომარეობა“, - აღნიშნავს მაჭავარიანი.