მალე ქართული მართვის მოწმობის გამოყენებას, ევროპაშიც შეძლებთ

ევროპაში მცხოვრები საქართველოს მოქალაქეებისთვის სასიამოვნო სიახლე გვაქვს, როგორც „პირველი არხის“ ეთერში საქართველოს საგარეო საქმეთა მინისტრის მოადგილემ ვლადიმერ კონსტანტინიდიმ განაცხადა, სულ მალე საქართველოში აღებული მართვის მოწმობის გამოყენება ევროპულ ქვეყნებშიც შესაძლებელი იქნება.

ვლადიმერ კონსტანტინიდი: „უცხოეთში, განსაკუთრებით ევროპის ქვეყნებში, საკმაოდ მაღალია ჩვენი მოქალაქეების რაოდენობა. დიასპორის წარმომადგენლებმა გვთხოვეს დახმარება, მაგალითად, მართვის მოწმობის აღიარების საკითხში, რაზეც ჩვენ აქტიურად ვმუშაობდით. ახლო მომავალში მოხდება ამ სტანდარტების შეჯერება, ბევრი ჩვენი თანამემამულე შეძლებს, რომ ქართული მართვის მოწმობით ისარგებლოს“.

დღეს არსებული რეგულაციებით, ქართული მართვის მოწმობით სარგებლობა უცხო ქვეყნებში 6 თვიდან 12 თვემდეა შესაძლებელი, დამოკიდებულია ქვეყანაზე. აღნიშნული ვადის გასვლის შემდეგ მძღოლი ვალდებულია, იმ ქვეყნის მართვის მოწმობა აიღოს სადაც ცხოვრობს. ამისთვის მას გამოცდის ჩაბარება მოუწევს. რაც ძალიან დიდი ძალისხმევსთან და თანხებთან არის დაკავშირებული. იმ შემთხვევაში კი, თუ უცხო ქვეყანა ქართულ მართვის მოწმობას საერთაშორისო ძალას მიანიჭებს, საქართველოს მოქალაქეებს აღნიშნული ვადის გასვლის შემდეგაც აღარ მოუწევთ ადგილობრივი მართვის მოწმობის ასაღებად გამოცდის ჩაბარება და  ქართული მართვის მოწმობით სარგებლობის  შესაძლებლობა ექნებათ.

მაგრამ საქართველოში მართვის მოწმობის მისაღებად, გამოცდის ჩაბარების კანონმდებლობა შეიცვალა და წესები ევროპულ სტანდარტებთან შესაბამისობაში მოვიდა. 2022 წლის 25 აპრილიდან თეორიულ გამოცდასთან ერთად სავალდებულო გახდება პრაქტიკული გამოცდის ჩაბარება ქალაქის პირობებში. კერძოდ, ეს ეხება პირველ ეტაპზე B და BE კატეგორიის მართვის მოწმობებს, ხოლო 2022 წლის 7 ნოემბრიდან ქალაქის პირობებში გამოცდის ჩაბარება სავალდებულო გახდება ყველა კატეგორიისთვის.

რაც შეეხება მანამდე აღებულ მართვის მოწმობებს, 2012 წლის 1 აგვისტოდან აღებული ეროვნული მართვის მოწმობით სარგებლობა საქართველოს მოქალაქეებს ევროპის თითქმის ყველა ქვეყანაში მხოლოდ 6 თვის განმავლობაში შეუძლიათ, ხოლო 2012 წლის 1 აგვისტომდე აღებულ მართვის მოწმობას, საქართველოს მოქალაქე მას საზღვარგარეთ ვერ გამოიყენებს. შესაბამისად, საჭიროა საერთაშორისო მართვის მოწმობის აღება. საერთაშორისო მართვის მოწმობა გაიცემა ეროვნული მართვის მოწმობის საფუძველზე 3 წლის ვადით. როგორც ეროვნულ, ისე საერთაშორისო ტიპის მართვის მოწმობას „საგზაო მოძრაობის შესახებ“ კონვენციის წევრი სახელმწიფოები აღიარებენ იმ ვადით, რა ვადაც შესაბამის სახელმწიფოში მოქმედი კანონმდებლობითაა დადგენილი, ანუ დამოკიდებულია რომელ ქვეყანას რა შეთანხმება აქვს საქართველოსთან, აღნიშნულ საკითხთან დაკავშირებით.