მამუკა მდინარაძე: პირველი შეცდომა მაშინ დაუშვეს, როდესაც აქცია 7 ნოემბერს დააანონსეს

ტყუილები, „ფეიკები“, რომელიც მათი მხრიდან ვრცელდება, ერთადერთი მიზანი აქვს, აღაშფოთონ საზოგადოება, - ეს განცხადება „ქართული ოცნების“ ერთ-ერთმა ლიდერმა, მამუკა მდინარაძემ პარტიის ოფისში გამართულ ბრიფინგზე გააკეთა.

„აბსოლუტურად სხვა გამოწვევებია ამ საზოგადოებაში და ამ თემებზე უნდა ვილაპარაკოთ. მათი მიზანია, რომ ჩაგვითრიონ ამ დღის წესრიგში. ამაზე ჩვენი სწორება ნამდვილად არ იქნება. თვითმმართველობის არჩევნები მმართველი პარტიის, „ქართული ოცნების“ გამარჯვებით დამთავრდა და ამ არჩევნების შედეგად ხალხი ელოდება ცვლილებებს, მეტ დინამიკას და ადგილობრივ დონეზე მეტი პრობლემის გადაჭრას. გამორიცხულია, რომ რევოლუციური სცენარი განვითარდეს“, - აღნიშნა  მან.

„თვითმმართველობის არჩევნების შემდეგ საკრებულოებში პრობლემა არ აქვთ და გადიან პარლამენტიდან. ამის შემდეგ მიხვდნენ, რომ ეს მათი არაადეკვატური საქციელი არ იქნებოდა მათთვისაც გამოსადეგი და გადაწყვეტილება ისევ შეცვალეს. ეს შეიძლება იყოს განპირობებული მათი აგონიით, დაბნეულობით, მარცხით, რომელიც ისედაც მოსალოდნელი იყო“, - თქვა მამუკა მდინარაძემ.

მდინარაძის განცხადებით, პირველი შეცდომა მაშინ დაუშვეს, როდესაც აქცია 7 ნოემბერს დააანონსეს, შემდეგ საზოგადოების აღშფოთება ნახეს და გადაიფიქრეს 7 ნოემბერს აქციის ჩატარება.