სააკაშვილის ჩამოსვლის და მისი მომხრეების მიზანია ქვეყანაში არეულობის გზით ხელისუფლებაში რაღაც ცვლილებას მიაღწიონ - ირაკლი ქადაგიშვილი

პარლამენტის დეპუტატი მმართველი გუნდიდან, ირაკლი ქადაგიშვილი აცხადებს, რომ სააკაშვილის გლდანის დაწესებულებაში მკურნალობის თუ სხვა ჰოსპიტალში გადაყვანის გადაწყვეტილებას, მიიღებს ექიმების ოფიციალური დასკვნის საფუძველზე პენიტენციური სამსახური.

მისივე განცხადებით, სააკაშვილის შიმშილობის უკან დგას მისი და მისი მომხრეების მიზანი, რომ ქვეყანაში არეულობის გზით ხელისუფლებაში ცვლილებები მოახდინონ, ამიტომ ეს ფაქტორიც გასათვალისწინებელია.

„მიხეილ სააკაშვილის მდგომარეობაზე რამდენიმე საექიმო მეთვალყურეობა არსებობს. როგორც ვიცი, ამჟამად მისი მდგომარეობა სტაბილურია და გადაწყვეტილებას მისი იქ მკურნალობა იქნება თუ სხვა ჰოსპიტალში გადაყვანა, მიიღებს ექიმების ოფიციალური დასკვნის საფუძველზე პენიტენციური სამსახური.

ერთი რამ ვიცოდეთ, ყველაზე მეტად, თუ ვინმეა დაინტერესებული მიხეილ სააკაშვილის ჯანმრთელობის მდგომარეობით, ჯანმრთელობის შენარჩუნებით და მისი შიმშილობის შეწყვეტით, ეს არის ხელისუფლება, რადგან ვხედავთ, ოპოზიცია თავისი პოლიტიკური მიზნებიდან გამომდინარე სპეკულირებს მისი შიმშილობით და ჯანმრთელობის მდგომარეობით. ამ შიმშილობის უკან რა დგას, ეს არის მთავარი გასათვალისწინებელი.

შიმშილობა საპატიმრო ცხოვრებისთვის დამახასიათებელია და ამის მართვა ყოველთვის ხდებოდა. პატიმრები რაღაც მომენტში წყვეტდნენ შიმშილობას, მათ ყველა მოუწოდებს ხოლმე ამისკენ, ამ შემთხვევაში ცოტა სხვა რამესთან გვაქვს საქმე, ამხნევებენ გარედან, რომ არ შეწყვიტოს შიმშილობა, რადგან ეს პოლიტიკური მიზნებისთვის გვჭირდება - მისი მომხრეების ნარატივი ეს არის.

სააკაშვილის საბოლოო მიზანი, მისი ჩამოსვლის, მისი მომხრეების მიზანი არის ის, რომ საბოლოო ჯამში, ქვეყანაში არეულობის გზით ხელისუფლებაში რაღაც ცვლილებას მიაღწიოს, ესეც გასათვალისწინებელია, მაგრამ პირველ რიგში ხელისუფლება ყოველთვის ითვალისწინებს ჯანმრთელობას და უსაფრთხოებას, ამიტომ ის იქნება დაცული და თუ აუცილებლობა დადგა, მიღებული იქნება შესაბამისი გადაწყვეტილება,“ - განაცხადა ქადაგიშვილმა.

ამავე თემაზე:
🔵ვაჩერებ მედიკამენტოზურ მკურნალობას კრიტიკული მაჩვენებლების წინააღმდეგ- მოშიმშილე ელენე ხოშტარია

🔵დიმიტრი ხუნდაძე - არ დავუშვებთ, როგორც სააკაშვილის მიმართ რაიმე მძიმე შედეგის დადგომას, ასევე არეულობის შემოტანას