არალეგალი მიგრანტებისთვის იტალიამ Green pass-ი დაუშვა

იტალიაში, ივნისის თვიდან, აცრაზე ხელი მიუწვდება ყველას, მათ შორის იმიგრანტებსაც, მეტიც, მთელ რიგ რეგიონებში, აცრა შეუძლიათ არალეგალ იმიგრანტებსაც. მთავარია, პირს აღებული ჰქონდეს STP (Stranieri temporaneamente presenti), დროებითი სერტიფიკატი, რომელიც არალეგალ ემიგრანტებს სრულყოფილი სამედიცინო მომსახურების მიღების საშუალებას აძლევს.

ერთი შეხედვით, ეს ძალიან კარგი ამბავია, მაგრამ ყველაფერი ასე მარტივად არ არის. ჯერ კიდევ რამდენიმე დღის წინ, ინტერნეტპორტალი, საიდანაც ვაქცინაციის შემდეგ პიროვნების პერსონალური Green pass-ის ჩამოტვირთვა ხდება, STP-ის კოდს ვერ აღიქვამდა, შესაბამისად, ვაქცინირებული არალეგალი იმიგრანტები, ვერ ახერხებდნენ სერტიფიკატის აღებას, რაც დაგვეთანხმებით, რომ დიდი პრობლემაა, რადგან Green pass-ი მხოლოდ კინოში, ან რესტორანში დროის გასატარებლად არ არის საჭირო. იტალიის ხელისუფლების გადაწყვეტილებით, ოქტომბრის შუა რიცხვებიდან, ვაქცინაცია სავალდებულო ხდება, შესაბამისად Green pass-ის გარეშე მუშაობა, გადაადგილება, საერთო  სასადილოებს და საჯარო დაწესებულებებში შესვლა და სხვა ტიპის აქტივობები, თითქმის შეუძლებელი გახდება.

სექტემბრის დასაწყისში, მილანის CISL-ის საემიგრაციო დეპარტამენტის ხელმძღვანელმა, მაურიციო ბოვემ პროტესტი გამოხატა, რომ ხარვეზი რაც შეიძლება სწრაფად უნდა აღმოფხვრილიყო, რადგან ეს ადამიანები ისედაც რთულ მდგომარეობაში იყვნენ არალეგალობის გამო, ამ ხარვეზის მიზეზით კი, მათი მდგომარეობა უფრო დამძიმდებოდა.

როგორც ჩანს, შესაბამისმა ორგანოებმა საკითხის მნიშვნელობა გაითავისეს და ვაქცინირებული არალეგალი მიგრანტებისთვის აცრის დროებითი, ე.წ. შტრიხკოდიანი სერტიფიკატი დაუშვეს, რაც მათ საშუალებას მისცემს შედარებით სრულფასოვნად იცხოვრონ მას შემდეგ, რაც ქვეყანაში ვაქცინაცია სავალდებულო გახდება.

მოამზადა ნინა მამუკაძემ