არქიეპისკოპოს ჟოზე აველინო ბეტანკურის სააღდგომო მილოცვა

"CHRISTUS RESURREXIT ALLELUIA! ALLELUIA! ALLELUIA!

უფალი აღსდგას! ალილუია! ალილუია! ეს უძველესი მისალმება იმეორებს აღდგომის დილით, ქრისტეს ცარიელი სამარხის წინაშე ანგელოზის მიერ წარმოთქმულ სიტყვებს. საფლავთან მისულ მენელსაცხებლე დედებს - მარიამ მაგდალელსა და მარიამ იაკობისას ანგელოზმა აუწყა: ის აქ არ არის, აღსდგა! (მთ 28:6) მთელი მსოფლიოს მორწმუნენი იმეორებენ ამ სასიხარულო შეძახილს.

მას შემდეგ, მკვდრეთით აღმდგარი უფლის სახე არაერთხელ გამოსახულა ხატზე. მართლაც, აღდგომის კვირა დილით, ქართველები სიამაყით ივსებიან, როცა ხედავენ, როგორ იკმევა წმინდა პეტრეს მოედანზე მკვდრეთით აღმდგარი ქრისტეს უმშვენიერესი ქართული ხატი. ეს ხატი თაყვანიცემა იოანე პავლე II-ის პაპობის ხანიდან. მან ჩაანაცვლა სხვა, ძალზე ძვირფასი, მაგრამ მყიფე ძველი ხატი, რომელიც ამჟამად დაცულია, რათა მომავალმა თაობებმა თაყვანი სცენ მას. ქართული ხატის ნახვა ყველას შეუძლია წმინდა სააღდგომო ლიტურგიის დროს. ხატი იკმევა. საკმეველი ზემოთ მიიწევს, ნიშნად ჩვენი მაცხოვრის მიწიერი თაყვანისცემისა და დიდებისა.

ერთხელ, ერთმა ცნობისმოყვარე ურწმუნო კაცმა ჰკითხა მღვდელს: რა არის საჭირო ქრისტიანი რომ გახდე? მღვდელმა უპასუხა: უნდა იწამო ქრისტეს აღდგომა, ხსნა და მარადიული ცხოვრება! ეს სამი რამ ადამიანის ემპირიული გამოცდილების მიღმაა. ეს დიადი ზეშთაგონებაა.

ამიტომაცაა აღდგომა ქრისტიანული კალენდრის უდიდესი დღესასწაული. საუკუნეების მანძილზე მთელი მსოფლიოს ქრისტიანები თითქმის იმგვარადვე ზეიმობდნენ აღდგომას, როგორც ჩვენ ვზეიმობთ ცეცხლითა და სინათლით, გალობითა და წმინდა წერილით, წმინდა წყლითა და ნათლობით, ევქარისტიითა და ზიარებით.

ქართული ხატი, მკვდრეთით აღმდგარი უფლის სხვა არაერთი ხატის მსგავსად, იმის განსახიერებაა, რომ კათოლიკეებს, მართლმადიდებლებს და სხვა ტრადიციის ქრისტიანებს აერთიანებთ რწმენა მკვდრეთით აღმდგარი ერთი და იმავე უფლისა - ჩვენი მაცხოვრისა. ჩვენ ყველანი ღმერთის შვილები ვართ.
აღდგომის დღესასწაულში ვზეიმობთ ქრისტეს გამარჯვებას სიკვდილზე. კეთილმა სძლია ბოროტს. წლის ამ ყველაზე მნიშვნელოვან დროს, ვლოცულობ და შევთხოვ ღმერთს მოიღოს თავისი ლოცვა-კურთხევა თქვენზე, თქვენს ახლობლებსა და საკრებულოებზე. უფალი აღსდგა! ალილუია! ალილუია! ალილუია!"

არქიეპისკოპოსი, ჟოზე აველინო ბეტანკური