ბარის ქართველი ემიგრანტები, ხვიჩა კვარაცხელიას საგულშემატკივროდ, ნეაპოლში ჩავიდნენ

უკვე რამდენიმე კვირაა, იტალიაში მცხოვრები ქართველი ემიგრანტების მთელი ყურადღება და ემოცია, იტალიის ერთი ქალაქისკენაა მიმართული. ეს ქალაქი ნეაპოლია და ემოციების ზღვა ახალგაზრდა, უნიჭიერესი და უკვე თამამად შეგვიძლია ვთქვათ უძლიერესი ფეხბურთელის, ხვიჩა კვარაცხელიას დამსახურებაა.

ქართველი ემიგრანტები უპირობოდ გულშემატკივრობენ Napoli-ს, იმისდა მიუხედავად, მოსწონთ თუ არა ფეხბურთი, ან კონკრეტულად ნეაპოლის გუნდი. მთავარია, რომ იქ ქართველი თამაშობს, ქართველი, რომელმაც ქალაქი, სადაც სპორტი რელიგიადაა ქცეული, ერთ ხმაზე აამღერა ყველა და ამ სიმღერას ხვიჩა კვარაცხელია ჰქვია. 

დღეს Napoli-Liverpool-ის შეხვედრაა. სწორედ ამ წუთებში, როგორც ბარიში მცხოვრები ფიქრია კუჭუხიძის პირდაპირი ჩართვებიდან ვიგებთ, ნეაპოლში ქალაქ ბარიდან ქართველები მიემართებიან, ქართული დროშებით. როგორც ჩვენთან საუბრისას ფიქრია კუჭუხიძემ აღნიშნა, ნეაპოლში ქალაქ ბარიდან უამრავი  ქართველია ჩასული. სტადიონის მიმდებარე ტერიტორიაზე საქართველოს დროშები ფრიალებს და ერთსულოვნება ზეიმობს. 

დღეს, ხვიჩას განსაკუთრებული მხარდაჭერა ექნება, ევროპის ერთ-ერთი უძლიერესი გუნდის წინააღმდეგ თამაშისას. ქართველებმა ხომ მართლაც ნეაპოლელებივით საოცარი, გადამდები და ემოციური გულშემატკივრობა ვიცით.