ემიგრანტი ჟურნალისტი - „ისევ მაქ ვიქნებოდი, ოთხას ლარიან ხელფასს მიჩიჩინებული და მშვიდად დავიხოცებოდით შიმშილით“

„ეს რომ არ გექნა, ისევ მაქ ვიქნებოდი ოთხას ლარიან ხელფასს მიჩიჩინებული და მშვიდად დავიხოცებოდით შიმშილით“, -  ამის შესახებ ემიგრანტი, ჟურნალისტი ლალი იმედაიშვილი  ფეისბუკგვერდზე  წერს.
 
„რაღაც ძალიან მადლიერების ნოტაზე გამომეღვიძა ამ დილით. მადლობა ღმერთო ჩემი ორი გოგონასათვის, მადლობა რომ სწორედ ისეთები არიან, როგორებიც მინდოდა ყოფილიყვნენ. მადლობა ჩემს ერთგულ, საყვარელ, უანგარო ადამიანებს, ცოტანი ხართ, მაგრამ საუკეთესონი. ყველაფერი საუკეთესო კი ცოტაა სამყაროში.
მადლობა ყველა ადამიანს, ვინც წამიერად გაიელვა ჩემს ცხოვრებაში, მაგრამ ამითაც კვალი დატოვა, ვინც უკეთესობისკენ შეცვლა მაფიქრებინა.

იმათაც მადლობა, გულგრილად რომ ჩამიარეს და მოხედვაც დაეზარათ, ყველა თავისი ტვირთით მიდის საკუთარი მომავლისკენ და ალბათ ეს ტვირთი ზოგჯერ იმაზე მძიმეა, ვიდრე წარმოგვიდგენია.
ყველა უმცირესი სიკეთე მახსოვს, რაც ადამიანებმა ჩემთვის გამოიმეტეს, მადლობა ამ მცირედისთვისაც. ეს სიკეთეები მეც მიბიძგებდა ხოლმე, სხვებისთვის იმავეს გაკეთების სურვილს მიჩენდა. მთელი ცხოვრება თავში მაქვს ჩაჭედილი - უკვალოდ არაფერი არ იკარგება სამყაროში, ყველა მიზეზს მოსდევს თავისი შედეგი.

და ბოლოს, მადლობა შენ "ძვირფასო მთავრობავ", გასაქანი რომ არ მომეცი, სუნთქვის, არსებობის, მუშაობის და ადამიანური ცხოვრების საშუალება რომ შემიზღუდე, ჩემი შვილების გვერდით ცხოვრების უფლება რომ ჩამომართვი, პირადად ჩემგან მიიღე ამისთვის მადლობა. ეს რომ არ გექნა, ისევ მაქ ვიქნებოდი ოთხასლარიან ხელფასს მიჩიჩინებული და მშვიდად დავიხოცებოდით შიმშილით. სწორედ შენ მაიძულე, შემეცვალა ჩემი და ჩემი ოჯახის ცხოვრების წესი. შენი "წყალობით" ახლა, როგორც არასოდეს ცხოვრებაში, ისე ახლოს ვარ ჩემი მიზნების და ოცნებების რეალობად ქცევის შესაძლებლობასთან.
ახლა უკვე ვიცი, რომ ჩემი შვილები პროგრესული და განათლებული მომავალი თაობის ორგანული ნაწილი იქნებიან. ეს თაობა სამუდამოდ შეცვლის ჩემს ქვეყანაში დროებით გამეფებულ სიბნელეს და ამაში მეც მექნება სულ ცოტაოდენი წვლილი.
მადლობა“ - წერს ქართველი ჟურნალისტი. 

ლალი იმედაიშვილი იტალიაში სამუშაოდ 2 წლის წინ წავიდა.

ასევე დაგაინტერესებთ:

🔵1902 წლის სეზონი გომის მთაზე- ვოდევილებით, კონცერტით და პოეზიით