იტალიაში ემიგრანტი ონისე ქობალია ტრაგიკულად დაიღუპა - ExclsiveTV-ის გარდაცვლილის ოჯახი დაუკავშირდა

იტალიაში, ქალაქ ბერგამოში ქართველი ემიგრანტი 33 წლის ონისე ქობალია დაიღუპა. თავდაპირველად გარდაცვალების მიზეზის შესახებ, არასწორი ინფორმაცია გავრცელდა. რედაქციაში ქობალიას მეუღლე ელენე ხვედელიძე და მამიდაშვილი ფატი ბულია დაგვიკავშირდნენ. მათი თხოვნით მართებულ ინფორმაციას ვაქვეყნებთ.

ტრაგედია 24 იანვარს მოხდა. როგორც ირკვევა, ემიგრანტის გარდაცვალების მიზეზი, ბუნებრივი აირის გაჟონვაა. ქობალიასთან ერთად მისი უკრაინელი დამსაქმებელიც იმყოფებოდა. ისინი ტოსკანადან, ლივორნოდან ბერგამოში სამუშაოს გამო, ერთი თვის წინ წასულან, სადაც ბინის რემონტზე მუშაობდნენ. უწესიერესი, უპატიოსნესი, საოცარი ადამიანი... ასე ახასიათებენ ონისე ქობალიას ადამიანები, რომელთაც თუნდაც პატარა შეხება ჰქონიათ მასთან.

ელენე ხვედელიძე, მეუღლე: ერთმანეთი სამი წლის წინ გავიცანით, 11 თვეა რაც ერთად ვართ. 5 მარტს ჯვრისწერა უნდა გვქონოდა და ეს უბედურება დაგვატყდა თავს. ბერგამოში წამოიყვანეს მეტლახის დასაგებად. თავის უკრაინელი დამსაქმებელი სულში ისვამდა, როდესაც ნახა რა ადამიანი იყო. ცრემლის მორევში გავატარე და ვატარებ. 

საკუთარ ფეისბუკ გვერდზე კი, ელენე სულის შემძვრელ პოსტს აქვეყნებს: "ონისეეეე! ჩემო ყველაზე ალალმართალო ბიჭო. რატომ გამიშვი ხელი, ჩვენ ხომ ბევრი გეგმები გვქონდა მიზნად დასახული. 5 მარტს ხომ ერთი სული გვქონდა ქორწილი გადაგვეხადა. ჩემი ოცნება იყო თეთრი სადედოფლო ჩამეცვა და შენთან ერთად საკურთხეველთან ფიცი დამედო, ფიცი რომელიც ჩვენს სიყვარულს უფრო მტკიცეს გახდიდა. ერთი სული მაქვსო ცრემლებით სავსე თვალებით მეუბნებოდი როდის გნახავ დედოფლის ფორმითო. შენ კი მიმატოვე! დამტოვე მარტოდ ამ ტკივილთან, ამ ჯოჯოხეთ დღეებთან! მეწვის სული მტკივა ვერ ვისვენებ! რა გავაკეთო მითხარი რა მოვიმოქმედო, ჩემო ყველაზე დიდო სიყვარულო, ადამიანო პატიოსანო სულის მატარებელო! შეხვედრამდე ჩემო ბიჭო".

ფატი ბულია, მამიდაშვილი: მთელი ცხოვრება ჩემთან იყო, ონისე ჩემი გაზრდილია, ჩემს გულზე გაზრდილი ბავშვია. ჩემი ძმა არის, ბიძაშვილი კი არა. ერთად ვიყავი საქართველოშიც და იტალიაშიც ყველგან ერთად ვიყავით. ჩემი ონისე...

ოჯახი ონისე ქობალიას საქართველოში გადაასვენებს.

ExclusiveTV-ის რედაქცია ღრმა მწუხარებას გამოთქვამს მომხდარის გამო და სამძიმარს უცხადებს გარდაცვლილის ოჯახს და ახლობლებს.