Lenticchie და Cotechino - იტალიური საახალწლო ტრადიცია, რომლის შესრულებაც იღბალს მოგიტანთ?!

იტალიაში, ისევე როგორც სხვა ქვეყნებში არსებობს ტრადიციები და ცრურწმენები, რომლებიც თაობიდან თაობას გადაეცემა და ბევრ ადამიანს სჯერა, რომ თუ ირწმუნებს, აუცილებლად იმოქმედებს.

იტალიაში საახალწლო ერთ-ერთი ყველაზე გავრცელებული ტრადიცია, ისევ და ისევ სუფრას ეხება. ახალი წლის ღამეს, იშვიათად ნახავთ იტალიურ ოჯახს, რომლის სუფრაზეც არ იქნება ოსპი და კოტეხინო - lenticchie e cotechino. იტალიელებს ღრმად სწამთ, რომ თუ ახალი წლის ღამეს ამ საკვებს მიიღებენ, მომავალი წელი იღბლიანი იქნება.

და მაინც, რატომ ითვლება ოსპი და კოტეხინო იღბლის მომტანად?

ოსპი - იტალიაში მიაჩნიათ, რომ ოსპს ფული მოაქვს და თუ მას ახალი წლის ღამეს მიირთმევენ, ის წელიწადი მდიდარი და ფინანსურად უზრუნველი ექნებათ.

ამბობენ, რომ ამ მოსაზრებას საფუძველი ძველ აღთქმაში აღწერილმა სცენამ დაუდო. სადაც მოთხრობილია, რომ ესავმა საკუთარ ძმა იაკობთან ჩხუბის შემდეგ, გადაწყვიტა მთელი ქონება ოსპის ერთ წვნიანში გაეცვალა. სავარაუდოდ, სწორედ აქედან მოდის იმის რწმენა, რომ ოსპი ფულისა და სიმდიდრის სიმბოლოა.

დროთა განმავლობაში ცრურწმენა ტრადიციად იქცა. რომაელების ეპოქაში 31 დეკემბერს, მეგობრებისთვის ერთი ქისა ოსპის ჩუქება, აუცილებელიც კი იყო. 

კოტეხინო - კოტეხინოს შემთხვევაში საქმე სხვაგვარადაა. ეს პროტეინებითა და ცხიმებით სავსე უგემრიელესი საკვები, იტალიელებს თან უყვართ, თან სძულთ. ეს არის სუნელებით შეზავებული დაკეპილი ცხიმიანი ხორცი, რომელსაც ძეხვის ფორმა აქვს მიცემული. წლების მანძილზე მიიჩნეოდა, რომ თუ თავს კოტეხინოს ყიდვისა და მირთმევის უფლებას აძლევდი, ნიშნავდა, რომ მდიდარი იყავი. ანუ ის არა იმდენად იღბლის, რამდენადაც კეთილდღეობის სიმბოლოა.