სიკვდილი დაბადებამდე - იტალიაში დატრიალებული ტრაგედიის კიდევ ერთი მსხვერპლი

სამახსოვროდ მხოლოდ ფოტო დარჩა, საიდანაც მოღიმარი სელენა, მეოცნებე თვალებით იყურება და თავის ჯუზეპეს ეყრდნობა. ფოტო 2021 წლის 10 აპრილით თარიღდება და წყვილის ცხოვრების ყველაზე ბედნიერ დღეს ასახავს, წყვილის, რომელიც იტალიაში, აგრიჯენტოს პროვინციაში, რავანუზაში გუშინ გვიან ღამით დატრიალებულ ტრაგედიას ემსხვერპლა. 

გაზის გაჟონვის შედეგად მომხდარმა აფეთქებამ, რამდენიმე შენობის ნგრევა გამოიწვია. მეხანძრე-მაშველები, ამ დრომდე აგრძელებენ სამძებრო სამუშაოებს. ისინი ტექნიკის გამოყენებას ერიდებიან, რადგან ჯერ კიდევ აქვთ იმედი, რომ ნანგრევებიდან ვინმეს კიდევ ამოიყვანენ ცოცხალს.

სელენას და ჯუზეპეს მსგავსად, ვერ მოხერხდა კიდევ რამდენიმე ადამიანის გადარჩენა: პიეტრო, ენცა, კარმელა, ჯოაკინა, კალოჯერო, ანჯელო და კიდევ ერთი ჯუზეპე, ყველაზე ასაკოვანი დაღუპულთა შორის, რომელსაც მალე 90 წელი უნდა შესრულებოდა.

ტრაგედიის მსხვერპლთა შორის არის კიდევ ერთი ადამიანი, რომელიც ოფიციალურად, სახელით და გვარით, არასდროს დაფიქსირდება გარდაცვლილთა შორის, რადგან მშობლებმა მისთვის სახელის დარქმევაც ვერ მოასწრეს. სელენა თითქმის ცხრა თვის ორსული იყო და ყველა გამოთვლით ერთ კვირაში უნდა ემშობიარა, თუმცა...

ამავე თემაზე:

📌 იტალიაში გაზსადენი აფეთქდა, 12 პირი დაკარგულად ითვლება, მათ შორის სამი ბავშვი (ფოტოები)

📌 ტრაგედია იტალიაში - არიან დაშავებულები და გარდაცვლილები (ვიდეო)

📌 უამინდობა იტალიაში: ჩანგრეული ხიდი, ზვავი და 9 გადარჩენილი მეზღვაური (ფოტოები)