ვენეცია კვლავ იძირება

ვენეცია კვლავ ჩაძირვის საფრთხის წინაშეა. შემოდგომის დადგომასთან ერთად, საკითხი კვლავ გამწვავდა. ბოლო რამდენიმე დღის განმავლობაში გადაუღებელი წვიმის შედეგად, "სან მარკოს" მოედანზე წყლის დონემ 93 სმ-ით აიწია. დაიტბორა "სან მარკოს" ეკლესიის იატაკიც. თუმცა, არა მთლიანი ტაძარი, არამედ, მხოლოდ ცენტრალური, თაღებშუა ნაწილი, XI საუკუნის მოზაიკური ტიპის იატაკი, რომლის ღირებულება და მნიშვნელობაც შეუფასებელია. მოზაიკის იატაკი ყველაზე მეტად 2019 წლის წყალდიდობისას დაზიანდა, როდესაც მთლიანი ეკლესია დაიტბორა.

უფრო ნათელი რომ იყოს, რატომ ხდება "სან მარკოს" მოედნის დატბორვა ასე ინტენსიურად, გეტყვით, რომ ქალაქის ეს ნაწილი ყველაზე დაბალია და ზღვის დონიდან 80 სმ-ზე მდებარეობს, ხოლო რაც შეეხება ტაძარს - 88 სმ-ზე. როგორც ზემოთ აღვნიშნეთ, ამჯერად წყლის დონემ 93 სმ-ით აიწია, შესაბამისად, დატბორვაც გარდაუვალი იყო. შექმნილმა ვითარებამ შეაფერხა სარესტავრაციო და გამაგრებითი სამუშაოები, რაც მინის ჯებირის მონტაჟს გულისხმობს, რომელმაც წყლის ნაკადისაგან უნდა დაიცვას საუკუნოვანი ტაძარი.

5 ოქტომბრიდან ფუნქციონირება უნდა დაეწყო MOSE-ს, სპეციალურ ელექტრომექანიკურ ექსპერიმენტულ სისტემას, რომელიც მობილური კაშხლების კომპლექსს წარმოადგენს. აღნიშნული სისტემა შედგება ოთხი სპეცბარიერისგან და განლაგებულია ვენეციის ლაგუნის შესასვლელებში. ამ სისტემის საშუალებით ვენეცია წყალდიდობისგან მეტ-ნაკლებად დაცული იქნებოდა, თუმცა მედიისთვის ჯერჯერობით უცნობი მიზეზების გამო, სისტემა ექსპლუატაციაში არ ჩაეშვა.

წყარო: corrieredelveneto.corriere.it