ვინ და როგორ გააკონტროლებს “ბადანტეს” Green pass-ს

15 ოქტომბრის მოახლოებასთან ერთად, დაძაბულობა უფრო და უფრო მატულობს. იტალიაში სავალდებულო ხდება Green pass-ი ყველა იმ პირისთვის, ვინც დასაქმებულია, საჯარო თუ კერძო სექტორში, მაგრამ კითხვები ბევრია, პასუხები - ბუნდოვანი. მათ შორის, ერთ-ერთი მთავარი შეკითხვაა, ვინ შეამოწმებს დასაქმებულთა Green pass-ს?

იტალიური პრესის თანახმად, მთავრობის ოფიციალურ საიტზე „ყველაზე ხშირად დასმული კითხვებიდან“ ვიგებთ, რომ სხვადასხვა სექტორში კონტროლის სხვადასხვა რეგულაცია იმოქმედებს.

ამ შემთხვევაში, ყურადღება გავამახვილოთ შინამოსამსახურეების, მომვლელების (ბადანტეების), ძიძების კატეგორიაზე. როგორც ირკვევა Green pass-ის კონტროლის ვალდებულება, იმ ოჯახს ეკისრება, სადაც პირია დასაქმებული. მაგრამ როგორ გაკონტროლდება, თუ რამდენად იცავს აღნიშნულ რეგულაციას დამსაქმებელი ოჯახი, ცოტა ბურუსითაა მოცული, რადგან კარაბინერებს პირად საკუთრებაში, სახლის მეპატრონის თანხმობის გარეშე, შესვლის უფლება არ აქვთ. მეპატრონეს კი შეუძლია კარაბინერებს კარი საერთოდაც არ გაუღოს.

ახალ რეგულაციასთან წინააღმდეგობაში კიდევ ერთი საკითხი მოდის. მაშინ როდესაც „ბადანტე“ ვალდებულია იქონიოს Green pass-ი, შესაძლოა მოუწიოს ისეთ პირთან მუშაობა, რომელსაც მსგავსი სერტიფიკატი არ აქვს და მას კანონიც არ ავალდებულებს, თუ პენსიონერია, ან უბრალოდ არსადაა დასაქმებული.

ახალი რეგულაციებით, Green pass-ის გარეშე მუშაობა, ფულად ჯარიმასაც (600-დან 1500 ევრო) ითვალისწინებს როგორც დასაქმებულისთვის, ასევე დამსაქმებელი ოჯახისთვის. განმეორების შემთხვევაში, თანხა კიდევ უფრო იზრდება. არაოფიციალური მონაცემებით, იტალიაში ოჯახებში, 2 მილიონამდე პირი მუშაობს. აქედან მხოლოდ 900 ათასია ლეგალურად მცხოვრები და დასაქმებული და მათგან მხოლოდ 50% აცრილი. შესაბამისად, გასაკონტროლებლად, რაოდენობა საკმაოდ დიდია. საქმეს კიდევ უფრო ართულებს არალეგალურად მცხოვრები და დასაქმებული "ბადანტეებისა" და შინამოსამსახურეების კონტროლი, რადგან ისინი ოფიციალურად არსად ფიქსირდებიან. ლეგალურად დასაქმებულთა შემთხვევაში, ამ ეტაპზე ყველაზე მარტივი გამოსავალი INPS-ისა (სოციალური დაცვის ეროვნული ინსტიტუტი) და  ASUR-ის (ჯანმრთელობის ერთიანი რეგიონალური ორგანო) მონაცემების შედარებაა. შესაბამისმა ორგანოებმა შეუძლიათ შეადარონ INPS-ში დარეგისტრირებული სამუშაო კონტრაქტები ASUR-ის მონაცემებს, სადაც აღრიცხულია იტალიის ტერიტორიაზე ლეგალურად მცხოვრები თითოეული პირის მონაცემები ჯანდაცვის ფარგლებში.

ნინა მამუკაძე