ვის ხელში გადადის მცირე ბიზნესი რომში?!

რომში კოვიდპანდემიით გამოწვეული შეზღუდვები უარყოფითად აისახა ადგილობრივ მცირე თუ მსხვილ ბიზნესზე. გაზეთი ,,Il Tempo" რომის სავაჭრო პალატის მონაცემებზე დაყრდნობით წერს, რომ პანდემიის დაწყებიდან დღემდე დედაქალაქში 200 სასურსათო მაღაზია, რომელსაც იტალიელი მფლობელი ჰყავდა იძულებული გახდა დახურულიყო.  

მაშინ როდესაც იტალიის დედაქალაქის ცენტრალურ თუ ისტორიულ ადგილებში არაერთი მნიშვნელოვანი ბიზნესი პანდემიით გამოწვეულმა ეკონომიკურმა კრიზისმა გააჩერა, დიდი სისწრაფით ემატება რომს უცხო ქვეყნის მოქალაქეების მიერ გახსნილი მცირე ბიზნეს ლოკაციები.

რომის სავაჭრო პალატის მონაცემებით, დედაქალაქში ბოლო ერთი წლის განმავლობაში გაიზარდა ბანგლადეშის მოქალაქეების მიერ გახსნილი მინი-მარკეტების რაოდენობა. ეპიდემიოლოგიური სიტუაციის გაუარესებისა და შეზღუდვების მიუხედავად 221 ახალი მინი-მარკეტი გაიხსნა რომში უცხო ქვეყნის მოქალაქეების მიერ.

თუ ბანგლადეშის მოქალაქეთა მცირე ბიზნესი 2019 წელს 871 ლოკაციით შემოიფარგლებოდა, 2021 წლის მესამე კვარტალში, ეკონომიკური კრიზისის მიუხედავად 221-ით გაიზარდა და 1092-ს მიაღწია. რომში არსებული 172 000 კომპანიიდან 26,9% ახლა უცხო ქვეყნის მოქალაქეთა ხელშია. ყოველი მეხუთე კომპანია არაევროკავშირის მოქალაქეების კუთვნილებაა. უცხო ქვეყნის მოქალაქეთა შორის მესამე ადგილზე "ბიზნესების" რაოდენობით ბანგლადეშის მოქალაქეები არიან.

ნონა გედენიძე სპეციალურად ExclusiveTV.ge-სთვის ემილია-რომანიადან