ლაპლანდია - სანტა-კლაუსის ჯადოსნური სოფელი

ლაპლანდია – ზღაპრული პროვინცია  ფინეთის ტერიტორიაზე, სადაც  ყველა ბავშვს უოცნებია მოგზაურობა, ცხოვრებაში ერთხელ მაინც (და არა მარტო ბავშვებს...).

მოგზაურობა როვანიემიდან იწყება, ეს ჩრდილოეთის ქალაქი პოლარული წრიდან 8 კილომეტრში მდებარეობს.
ზამთარში  როვანიემი  ლაპლანდიის ყველაზე საყვარელი კურორტი ხდება დიდებისთვის და პატარებისთვის – სწორედ აქ ატარებს უდიდეს დროს საშობაო სამზადისში  სანტა-კლაუსი.  
აქ, ქალაქიდან რამდენიმე კილომეტრში მდებარეობს სანტა-კლაუსის ცნობილი სოფელი, სანტას რეზიდენცია, რომელიც ახლა მთელ მსოფლიოშია ცნობილი. სანტა-კლაუსი აქ ყოველდღე მოდის, იღებს სტუმრებს, კითხულობს წერილებს (რომლების გაგზავნაც შესაძლებელია მისამართზე: Santa Klaus, 96930 Arctic Circle, Rovaniemi, Finland), და  იგებს, თუ რაზე ოცნებობენ ბავშვები და როგორი საჩუქრების მიღება სურთ საშობაოდ.

სანტა-კლაუსის სოფელში, გარდა სანტას ოფისისა და ფოსტისა, განთავსებულია ტურისტული კოტეჯები, უამრავი მაღაზია და რესტორანი, ირმების ფერმა. ზამთარში, სოფლის მოედანზე უამრავ გორაკებს აგებენ სასრიალოდ. სოფლის ცენტრში დიდი ნაძვის ხე დგას, რომელსაც მსოფლიოს სხვადასხვა ქვეყნების დროშებით რთავენ. ირგვლივ ყველაფერი ბრწყინავს და სადღესასწაულო ატმოსფეროა შექმნილი.

სანტა-კლაუსის ოფისი სოფლის მთავარი ღირსშესანიშნაობაა.
კაბინეტში მოხვედრა ოფისის გრძელი დერეფნის გავლით არის შესაძლებელი, სადაც სანტა და მისი უცვლელი დამხმარეები – გნომები  სიხარულით იღებენ სტუმრებს. 
მასთან ურთიერთობა რთული სულაც არ არის, რადგან სანტამ უამრავი უცხო ენა იცის.

აქვეა სანტა-კლაუსის ფოსტა,
აქ შეგიძლიათ შეუკვეთოთ წერილი სანტასგან მსოფლიოს ნებისმიერ წერტილში. წერილის შედგენასა და გაგზავნაში მხიარული ელფები დაგეხმარებიან. აქვე იღებენ მსოფლიოს სხვადასხვა კუთხიდან ბავშვების წერილებს და შემდეგ გადასცემენ სანტას.

საინტერესო სტატისტიკა: 1980 წლიდან სანტა-კლაუსმა 20 მილიონზე მეტი წერილი მიიღო.
ფოსტა, ისევე როგორც სანტას ოფისი, მთელი წლის განმავლობაში მუშაობს.

სოფელში კიდევ ერთი ღირსშესანიშნაობაა - პოლარული წრის გეოგრაფიული და ამავდროულად ზღაპრული საზღვრის კვეთა, რომელიც თეთრი ველით არის გამოსახული და დატანებულია წარწერა ” Arctic Circle”.

ელფების ჯადოსნური გამოქვაბული-
სოფლის მახლობლად სანტას მიწისქვეშა პარკი მდებარეობს, რომელშიც მხიარული ელფები ბინადრობენ. ეს გახლავთ გვირაბებისგან შემდგარი ნაგებობა, რომელიც პირდაპირ კლდეშია გამოჭრილი.
სანტა-პარკში თავგადასავლე მისის კლაუსის საკონდიტროსა და სამზარეულოში შესაძლებელია ჯანჯაფილის ორცხობილების დაგემოვნება და  გამოცხობაც კი.

ყინულის დედოფლის სამეფო  გაგაოცებთ ჩრდილოეთის ცხოველებისა და ზღაპრული პერსონაჟების სკულპტურებით ყინულის გალერეაში...

ელფები მოგიწყობენ მხიარულ მოგზაურობას მაგიური მატარებლით, რომელსაც ”წელიწადის დროები” ეწოდება. 

პარკი  ”არქტიკული ზამთრის სამყარო” - კიდევ ერთი შესანიშნავი ადგილი პატარებისთვის მდებარეობს სანტა კლაუსის სოფლის მახლობლად. მაგრამ ეს პარკი მხოლოდ ზამთარში მუშაობს – დეკემბრის დასაწყისიდან მარტამდე.

არ შეიძლება, დატოვო ეს ადგილები ისე, რომ ძაღლების ან ირმების მარხილით არ გაისეირნოთ და არ ნახოთ ულამაზესი ჩრდილოეთის ციალი.

ნატო როზომაშვილი