მახინჯაურთან გამორიყული გემი უსაფრთხოდაა - საზღვაო ტრანსპორტის სააგენტო

საზღვაო ტრანსპორტის სააგენტოს ინფორმაციით, რუსეთის დროშის ქვეშ მცურავი გემი, რომელიც ძლიერმა შტორმმა, მახინჯაურის სანაპიროზე გამორიყა, უკვე უსაფრთხოდ დგას საღუზე წერტილში.

სააგენტოს განცხადებაში ნათქვამია, რომ შესაბამის სამსახურებთან კოორდინაციით, გემმა თანდათანობით შეძლო ზღვისკენ სვლა.

„2022 წლის 7 იანვარს, ბათუმის ნავსადგურის აკვატორიის N4 საღუზე წერტილში დადგა რუსეთის დროშის ქვეშ მცურავი გემი, სახელწოდებით: SGV-Flot (IMO 8033089). გემზე იმყოფება ეკიპაჟის 13 წევრი. 14 იანვარს გემმა სააგენტოს ბათუმის ნავსადგურის სახელმწიფო კონტროლისა და ზედამხედველობის სამსახურისგან მიიღო გაფრთხილება ამინდის მოსალოდნელი მკვეთრი გაუარესების შესახებ.

ძლიერი შტორმის (ზღვის ღელვა აღწევდა 6 ბალს, ქარის სიჩქარე - 12-18 მ/წ.) გამო გემმა დაკარგა მანევრირების უნარი და ტალღებმა დაიწყო მისი წამოღება ნაპირისკენ. მიუხედავად აღნიშნულისა, გემმა საკუთარი ძალებით შეძლო ნაპირისკენ სვლის შეჩერება.

დაახლოებით 03:00 საათის შემდეგ, საზღვაო ტრანსპორტის სააგენტოს შესაბამის სამსახურებთან (ზღვაზე ძებნა გადარჩენისა და გემების მოძრაობის მონიტორინგის დეპარტამენტი და ბათუმის ნავსადგურის სახელმწიფო ზედამხედველობისა და კონტროლის სამსახური) მჭიდრო კოორდინაციიით, გემმა თანდათანობით შეძლო ზღვისკენ სვლა და ამ დროისათვის გემი უკვე უსაფრთხოდ დგას საღუზე წერტილში.

მახინჯაურში მთელი ღამის განმავლობაში ადგილზე იმყოფებოდნენ სააგენტოს თანამშრომლები, სამაშველო ჯგუფი, მობილიზებული იყო საგანგებო სიტუაციების მართვის სამსახური და საპატრულო პოლიცია.

საზღვაო ტრანსპორტის სააგენტოს შესაბამისი სამსახურები მუდმივ კოორდინაციაში იმყოფებიან გემთან და აგრძელებს მისი ადგილმდებარეობის მონიტორინგს“,-ნათქვამია, საზღვაო ტრანსპორტის სააგენტოს განცხადებაში.

ასევე დაგაინტერე­­­­სებთ:

🔵აშშ და იაპონია ცუნამის მოლოდინში - სანაპირო რაიონებში მოსახლეობის ევაკუაცია დაიწყო

🔵საქართველოში არამდგრადი ამინდი შენარჩუნდება

🔵„ომიკრონის“ ცირკულაცია იწყება - თამარ გაბუნია