“ახალი ტალღა წამოვიდა მაგინებლების, აგინებენ იმ ადამიანებს, რომლებმაც კოვიდით ოჯახის წევრი დაკარგეს” - ნინო თარხნიშვილი

ჟურნალისტი ნინო თარხნიშვილი, რომელიც პანდემიის დაწყებიდან ხშირად წერს კორონავირუსის შესახებ სტატიებს, შეურაცხყოფის მსხვერპლი გახდა.

ნინო თარხნიშვილი: "ახლა ახალი ტალღა წამოვიდა მაგინებლების. ადამიანების, რომლებმაც, სამწუხაროდ, ოჯახის წევრები კოვიდის გამო დაკარგეს. 
და გაგინებენ და გლანძღავენ მხოლოდ იმიტომ, რომ წერ კოვიდის შესახებ. ვაქცინაციის მნიშვნელობის შესახებ. 

წერენ როგორ დაეღუპათ ახლობლები კოვიდით, მაგრამ არც კოვიდსა და არც ვაქცინას არ აღიარებენ. მხოლოდ იმას ამბობენ, რომ მათი ახლობლები ექიმებმა დახოცეს და როგორც ექიმებს, ისე მე მომეკითხება 13 ათასი მკვდრის ცოდვა. 
და რომ უნდა მეშინოდეს, რადგან ერთხელაც დამხვდებიან ქუჩაში ამ 13 ათასი მკვდრის ახლობლები და სკალპს ამაცლიან.

პოსტებზე შეზღუდული მაქვს კომენტარები და სადაც კი რამე ძვეეელ ღია პოსტს წააწყდებიან, იქ აკომენტარებენ.
ამ გამწარებულ ადამიანებს მე რა უნდა ვუმტკიცო. თავისი უბედურებაც ხომ ეყოფათ, მაგრამ ტრაგედიაც რომ ვერაფერს უხსნით?
ოღონდ, მეც დავიღალე.
ხანდახან ვფიქრობ, რომ ამ ვირტუალური სივრციდან უნდა გავქრე.

ისევ ჩემთვის აჯობებს. აბა ვისაც არ უნდა, ისინი მაინც ვერაფერს გაიგებენ და რატო უნდა მაგინონ იმის გამო, რაც ჩემი პროფესია, ჩემი საქმეა."