"ამ ქალბატონმა თავისი ცხოვრებით, კიდევ ერთხელ დაამტკიცა დიდი შოთას სიტყვების ჭეშმარიტება: - "ლეკვი ლომისა სწორია, ძუ იყოს, თუნდა ხვადია"

მეცნიერი ისტორიკოსი, პაატა სურგულაძე ბრიტანეთის დედოფლის ელისაბედ მეორის გარდაცვალებას ეხმაურება და წერს:

"შოტლანდიაში, ბალმორალის სასახლეში გაჩერდა მისი გული.

როგორც ექიმები აღნიშნავენ, მისი უდიდებულესობა, დედოფალი ელისაბედ მეორე, მშვიდად გადავიდა მარადისობაში.

დამთავრდა მისი ეპოქა, მშფოთვარე და დიდი გამოწვევებით აღსავსე.

დიდმა ბრიტანეთმა დედა, პლანეტამ კი ერთ-ერთი ყველაზე დიდი, ბრძენი და გავლენიანი ქალბატონი დაკარგა.

ეჭვი არ არის, რომ მისი უდიდებულესობის სახელი ოქროს ასოებთ ჩაიწერება ბრიტანეთის ისტორიაში.

მან შთამომავლობას დაუტოვა მაგალითი იმისა, თუ როგორ უნდა ემსახურო შენს ქვეყანასა და ხალხს, როგორ უნდა სძლიო შენს თავს და შენი ცხოვრების უმთავრეს დანიშნულებად ქვეყნის სახელმწიფოებრივი ინტერესების დაცვა აქციო.

სწორედ ამიტომაც იყო, რომ დედოფალმა, ქვეშევრდომების დიდი სიყვარული და განსაკუთრებული პატივისცემა დაიმსახურა.

ის იყო მისი სამეფოს ყველა მოქალაქის მფარველი, სიმბოლო სიძლიერისა და სტაბილურობისა.

რკინის ნებისყოფით დაჯილდოებული სახელმწიფოდ მოაზროვნე მონარქი იყო მსახური თავისი ქვეყნისა და ხალხისა.

მისმა უდიდებულესობამ ღირსეულად ატარა ბრიტანეთის დედოფლის უმძიმესი გვირგვინი.

დღეს გლოვობს ბრიტანეთი, მასთან ერთად ასევე გლოვობს სხვადასხვა ქვეყნების მილიონობით მოქალაქე. ის ხომ მათი იმედიც იყო.

მთელი თავისი ცხოვრებითა და მოღვაწეობით ამ ღირსეულმა ქალბატონმა კიდევ ერთხელ დაამტკიცა დიდი შოთას სიტყვების ჭეშმარიტება: ,,ლეკვი ლომისა სწორია, ძუ იყოს, თუნდა ხვადია".

როგორც საქართველოს ერთი ჩვეულებრივი მოქალაქე, ადამიანი, რომლისთვისაც ძვირფასია ისტორია და ტრადიციები, გულით ვუსამძიმრებ დედოფალ ელისაბედ მეორის გარდაცვალებას ბრიტანეთსა და მის ყველა ქვეშევრდომს!",- წერს სურგულაძე.

ასევე დაგაინტერესებთ:

* ირაკლი ღარიბაშვილი: მაღალი ეკონომიკური ზრდის გამო, დღის წესრიგში დადგა ბიუჯეტში ცვლილებები, რომელიც ორიენტირებულია ბიუჯეტის დეფიციტისა და მთავრობის ვალის შემცირებაზე, ახალ პროექტებზე

* "ომის დაწყებიდან უკრაინამ საერთაშორისო პარტნიორებისგან $18 მილიარდის ოდენობის ფინანსური დახმარება მიიღო"

* "მეფე ჩარლზმა ბრიტანეთის პარლამენტს პირველად მიმართა" - მედია