"ამ თაობას შეუძლია დაასრულოს ათეულობით წლების დაგროვებული სიძულვილი და მიკერძოება" - არჩილ გამზარდია დავითაშვილისა და სააკაშვილის შვილებზე

"კობა დავითაშვილის შვილის წერილს გავეცანი. ისიც როგორ სადად, ადამიანურად, ეთიკურად გამართული იყო, დაცლილი სიძულვილისგან, მორალურობით და სამართლიანობით გაჯერებული“ - ამის შესახებ ჟურნალისტი, პოლიტიკის ექსპერტი არჩილ გამზარდია ფეისბუკის გვერდზე წერს.

როგორც ჟურნალისტი წერს, ამ თაობას შეუძლია დაასრულოს ათეულობით წლების განმავლობაში დაგროვებული სიძულვილი და მიკერძოება.

„ეს თაობა მიქმნის იმედს, მაშინ როდესაც მიხეილ სააკაშვილის და კობა დავითაშვილის შვილები, ახალგაზრდა ადამიანები შეიძლებოდა ადამიანური სისუსტეებით ყოფილიყო სავსე, პირადი ანგარიშებითაც, როდესაც მათთვის ძვირფასს ეხებოდა საქმე, მთელ ერზე მეტი ინტელექტი, გულითადობა, გონიერება და წესიერება გამოხატეს.

ეს მაძლევს სულ იმედს, ამ ჩაბნელებულ ქვეყანაში ნათელი რომ შეაქვთ ახალგაზრდებს. სიძულვილისა და ამორალობის საპირისპიროდ, სამართლიანობა და თანაგრძნობა რომ შეაქვთ

აღფრთოვანებული ვარ ამ ბიჭებით.

ამ თაობას შეუძლია დაასრულოს ჩვენი ათეულობით წლების განმავლობაში დაგროვებული სიძულვილი და მიკერძოება.

ეს ახალგაზრდები ახერხებენ საკუთარ გრძნობებზე მაღლა დადგომას და ერთადერთი, რასაც მოითხოვენ, სამართლიანობაა.

მსჯელობენ დარდითა და გულისტკივილით და არა ბოღმითა და აგრესიით, რაც მათ შემთხვევაში გასაგებიც კი იქნებოდა. რასაც ვერ ვახერხებთ ძალიან ბევრი, ამ ახალგაზრდებმა მოახერხეს, ისინი უნდა გახდნენ სამაგალითოები ძალიან ბევრისათვის ჩვენს ქვეყანაში, განსაკუთრებით პოლიტიკური ჯგუფებისათვის და მათი გულშემატკივრებისათვის“, - დაწერა ჟურნალისტმა.

მიხეილ სააკაშვილის ნათლულმა, თორნიკე დავითაშვილმა მიმდინარე პროცესებთან დაკავშირებით განცხადება გუშინ გაავრცელა და თქვა, რომ "დარწმუნებული ვარ, ნათლიათქვენს და მის სისტემას მამათქვენის მოკვლის 3 თუ 4 მცდელობა არ ჰქონია", თუმცა მაინც, შურისძიებას კარგი არასდროს და არავისთვის მოუტანია, და მოდი გადავაგოროთ რა ეს უბედური თავი საქართველოს ისტორიაში.

ამავე თემაზე:

🔵 „დარწმუნებული ვარ, თქვენს ნათლიას და მის სისტემას მამათქვენის მოკვლის მცდელობა არ ჰქონია“ - სააკაშვილის ნათლულის წერილი

🔵 "მესმის, რომ გაქვთ სერიოზული პრეტენზიები მამაჩემის მიმართ, მაგრამ მისი სიკვდილი არავის უნდა აწყობდეს" - ედუარდ სააკაშვილი ვიდეომიმართვას ავრცელებს