ბიძინა კულუმბეგოვი: ვისურვებდი, რომ მწვანე პასპორტები საზოგადოებრივ ტრანსპორტზეც გავრცელდეს

ალერგოლოგ-იმუნოლოგ ბიძინა კულუმბეგოვის განცხადებით, არსებობს ეპიდემიოლოგიური ვითარების გაკონტროლების ორი ძირითადი შესაძლებლობა: შემზღუდავი ღონისძიებები, ან ქვეყანაში ვაქცინაციის წარმატება. 

კულუმბეგოვის განმარტებით, მწვანე პასპორტები გარკვეულ იმედს იძლევა, თუმცა მიაჩნია, რომ მისი მოქმედების არეალი უნდა გაფართოვდეს.

ამ საკითხების შესახებ იმუნოლოგმა, საქართველოს პირველი არხის ეთერში ისაუბრა.

"ის რეალური შედეგი, რაც ახლა არსებობს, რაც ძალიან სავალალო და ტრაგიკულია ჩვენი ქვეყნისთვის, გამომდინარეობს იმ მოცემულობიდან, რაც ქვეყანაშია.

ერთი მხრივ, მწვანე პასპორტები, რომელიც დღეს ამოქმედდა, გვაძლევს იმის იმედს, რომ იმ სივრცეებში, სადაც ინფექცია ყველაზე ხშირად ტრიალებს და გენერირდება, უფრო მეტად იქნება გაკონტროლებული, თუმცა ვისურვებდი, რომ მწვანე პასპორტების მოქმედების არეალი უფრო ფართო იყოს.

ის იყოს საზოგადოებრივ ტრანსპორტში, ასევე მოეთხოვებოდეს იქ დასაქმებულ ადამიანებს, სადაც არის კვების ობიექტები, თუნდაც მაღაზიები და ა.შ. ამიტომ, ვფიქრობ, ეს იქნება შემდგომი ნაბიჯი, რადგან სხვანაირად ეპიდემიაზე მწვანე პასპორტების გავლენა ისეთი თვალსაჩინო ვერ იქნება…საზოგადოებრივ ტრანსპორტზე ალბათ უნდა გავრცელდეს.

მესმის, რომ ამას შეიძლება, ტექნიკური სირთულე ახლდეს თან. არ არის აუცილებელი, ამაზე ყველა მგზავრი იყოს შემოწმებული, უბრალოდ ადამიანებს უნდა ვუთხრათ, რომ ჩვენ ტრანსპორტში დავუშვებთ მხოლოდ მწვანე პასპორტის მქონე მოქალაქეებს, ამიტომ, რაც უფრო სწრაფად განხორციელდება ეს, ეპიდემიოლოგურ სიტუაციას წაადგება", – განაცხადა ბიძინა კულუმბეგოვმა.

საქართველოში დღეიდან, 1-ლი დეკემბრიდან „მწვანე პასპორტი“ ამოქმედდა.

მოქალაქეს მწვანე სტატუსი მიენიჭება იმ შემთხვევაში თუ ის აკმაყოფილებდეს შემდეგი კრიტერიუმებიდან ერთ-ერთს:

🔲 არის სრულად ვაქცინირებული;

🔲 გადატანილი აქვს Covid-19 და ვირუსის დადასტურებიდან გასულია 14 დღე;

🔲 ჩატარებული აქვს 72-საათიანი ვალიდურობის PCR ტესტი;

🔲 ჩატარებული აქვს 24-საათიანი ვალიდურობის ანტიგენ ტესტი.

ამავე თემაზე:

🔲 დღეიდან, რესტორნებს საათობრივი შეზღუდვა ეხსნებათ

🔲 რა უნდა ვიცოდეთ „მწვანე პასპორტთან“ დაკავშირებით? - კითხვები და პასუხები